Lumbardh Salihu, fituesi i edicionit të dytë të “Big Brother VIP Kosova”, hyri në politikë me ambicie të mëdha, por nuk arriti të sigurojë një vend në Kuvendin e Kosovës.
Pasi emri i tij u përfshi në listën e kandidatëve për deputetë nga radhët e Lidhjes Demokratike të Kosovës (LDK), pati një pritshmëri të lartë për suksesin e tij në zgjedhjet e 9 shkurtit.
Megjithatë, rezultatet e numërimit tregojnë se Salihu nuk arriti të marrë votat e mjaftueshme për të fituar një mandat deputeti.
Sipas të dhënave të fundit, ai ka siguruar vetëm 5,118 vota – një shifër që nuk e kalon pragun e nevojshëm për të hyrë në Kuvend.
Gjatë fushatës së tij, ai u përpoq të tërhiqte vëmendjen e publikut me deklarata të guximshme dhe sfida ndaj kryeministrit aktual, Albin Kurti.
Në një nga paraqitjet e tij publike, Salihu deklaroi se Kurti “nuk po e sheh realitetin nga xhipat e zi”, duke kritikuar distancimin e kryeministrit nga qytetarët e thjeshtë . Ai gjithashtu ndau një histori personale, duke treguar se në të kaluarën kishte pritur Kurtin në shtëpinë e tij, kur ky i fundit ishte mysafir .
Lumbardh Salihu u bë i njohur për publikun përmes pjesëmarrjes së tij në “Big Brother VIP Kosova 2”, ku rrugëtimi i tij e çoi drejt triumfit. Fitorja e tij në spektaklin televiziv i dha një popullaritet të madh, i cili u reflektua edhe në mbështetjen e tij në politikë, por që nuk ishte e mjaftueshme për të siguruar një mandat në Parlament.
Pavarësisht këtij rezultati, mbetet të shihet nëse Salihu do të vazhdojë përpjekjet e tij në politikë apo në ndonjë fushë tjetër të angazhimit publik. /Prive
