Pak muaj pas kurorëzimit, Njomza përballet me humbjen më të madhe të jetës – vrasjen e trefishtë tragjike në qendër të Gjilanit ku humbën jetën bashkëshorti i saj, Edmond Hasani, babai i tij, Selami Hasani, dhe Abedin Hoxha.
Në një intervistë të dhimbshme për Vox News Kosova, Njomza rrëfeu se për disa ditë është larguar nga Kosova për të marrë pak ajër dhe për të lehtësuar dhimbjen që e ka përfshirë gjithçka rreth vetes:
“Jam larguar prej Kosovës për disa ditë pasi, siç dihet, nuk ka shumë muaj që kemi bërë kurorëzimin. Kemi qenë të përgatitur për plane tjera, për jetë tjetër, për gjithçka tjetër. Ndodh një vrasje që ta shkatërron jetën. Kam ardhur vetëm për disa ditë që të liroj mendimet e mia, mërzinë time dhe të kthehem pak. Më është dashur të largohem, sepse mërzia është shumë e madhe për mua, për familjarët e Edmondit dhe për familjarët e Selamit.”
Ajo theksoi se kushdo në Gjilan e dinte se me kë kishin të bënin personat e përfshirë në këtë krim:
“Edhe me u vra në mes të ditës, në mes të qytetit, nga persona që kanë pasur shumë padi në polici… Ka insistuar me i takuar e me i vrarë persona pa i pasur asnjë borxh. Asnjë borxh. Ky është një rast i prerjes në besë, rasti i Edmondit dhe Selamit.”
Autorët e dyshuar, Mefail Shkodra dhe dy djemtë e tij, Edonis dhe Engjull, ndodhen ende në arrati dhe të njëjtit janë shpallur në kërkim nga policia menjëherë pas rastit.
