Pas suksesit të jashtëzakonshëm të Tilia dhe Ganymède, parfumë tejet të pëlqyer edhe në Kosovë e Shqipëri, Marc-Antoine Barrois kthehet me një aromë të re vizionare që përçon dritë, shpresë dhe një instalacion përfshirës që do të lërë gjurmë.
KAPITULLI I PARË: Milano, skena e parfumit të shpresës
Në zemër të Milanit, në kulmin e Design Week 2025, u prezantua një prej parfumave më intriguese dhe elegante të vitit: Aldebaran nga Marc-Antoine Barrois. Në një atmosferë që luhatej mes artit bashkëkohor dhe botës së parfumerisë luksoze, lansimi i Aldebaran ishte shumë më tepër sesa thjesht një prezantim arome – ishte një udhëtim emocional dhe sensorial drejt dritës, drejt optimizmit.
Eventi nisi me një konferencë dedikuar rritjes eksponenciale të brendit, e cila nuk ishte vetëm statistikore, por edhe artistike. Çdo fjalë që u shqiptua, çdo frazë që u artikulua nga Marc-Antoine e parfumieri Quentin Bisch, kishte aromë vizioni.
KAPITULLI II: Një instalacion që flet me dritë
“Mission Aldebaran” ishte jo vetëm titulli i instalacionit monumental të dizenjuar nga Antoine Bouillot, por edhe metafora e një epoke të re në botën e parfumeve. Instalacioni ishte vendosur në mënyrë të tillë që çdo i ftuar duhej të kalonte përmes tij për të mbërritur në darkën gala – një rrugëtim poetik që shpërfaqte transformimin nga errësira në dritë, nga e panjohura në shpresë.
Ai përfshinte pasqyra të gjata të varura që krijonin ndjesinë e pafundësisë, një pyll me litarë të errët që evokonin errësirën kozike dhe një fushë tuberozash prej letre të ndriçuar nga një glob i madh pulsues që simbolizonte yllin Aldebaran. Çdo hap përmes instalacionit ishte një akt përqafimi me elementët e brendshëm të parfumit – dritë, ndriçim emocional dhe shpresë.
Përvoja shumëdimensionale ishte e shoqëruar nga një peizazh zanor i krijuar nga kompozitori francez Thomas Roussel, që përcillte emocione të brishta dhe ndriçim emocional në çdo hap. Ishte homazh për vetë Aldebaranin – yllin e kuq gjigant që ndriçon 400 herë më shumë se dielli dhe që u zbulua në Mesjetë, tashmë kthyer në simbol të shpresës, pasionit dhe rrezatimit personal.
KAPITULLI III: Tuberosa si qendra e universit aromatik
Marc-Antoine Barrois e përshkroi momentin kur Quentin Bisch ia prezantoi tuberozën si “një rrezatim i panjohur, i pazakontë, i fortë dhe ndriçues.” “Nuk e njihja. Ishte si një yll që vetëm sapo e zbulon. Dhe Aldebarani më erdhi menjëherë në mendje, por pa e ditur qartë se si do ta lidhja.”
Bisch, që tashmë konsiderohet arkitekti olfaktiv i shumicës së krijimeve të Barrois, e kishte vetëm një qëllim: ta bënte tuberozën të flasë. Jo si në laborator, por si në natyrë. “Dua ta kthej tuberozën në një lule që flet me freski, me hidhëtimin e saj natyror, me anën e saj dramatike, por ta ruaj si burim drite,” – u shpreh ai për Prive.
KAPITULLI IV: Kompozita qiellore
Aldebaran është ndryshe nga gjithçka që kemi njohur nga parfumet e Marc-Antoine Barrois. Këtu nuk kemi të bëjmë me nota të komplikuara, me struktura të ngarkuara apo me “baza të sigurta”. Kemi vetëm një lule – tuberoza – dhe një shpresë: që bukuria, edhe kur është e vetme, mjafton të ndriçojë gjithçka.
Sipas vetë Barrois, parfumi është një portret olfaktiv i ndriçimit të brendshëm që qëndron përtej errësirës. Ai e quan atë një parfum ‘solar’, por jo ‘diellor’ – më tepër një reflektim i dritës së yjeve në shpirtin e njeriut.
Aroma është freskët, gjethore, por mbi të gjitha kremoze, gati si qumështi. Ka një lloj butësie që fshihet në nëntekst, si një buzëqeshje në errësirë. Por kjo buzëqeshje ndriçon gjithçka rreth saj.
KAPITULLI V: Një darkë mes dritës dhe hijes
Pas rrugëtimit multisensorial përmes “Mission Aldebaran”, të ftuarit u ftohën në një darkë të sofistikuar që ndodhi në një sallon të stilit art-deco në zemër të qytetit. Pjesëmarrësit vinin nga të gjitha anët e botës – koleksionistë, artistë, gazetarë, dashamirës të parfumit dhe miq të markës – duke e shndërruar këtë darkë në një përqendrim global të elegancës dhe ndjeshmërisë.
Dritat ishin të zbehta, tavolinat të mbuluara me tyl të tejdukshëm dhe qirinj që lëkundeshin lehtë mbi gota kristali. Moda dhe parfumi u takuan nën tingujt e një harpe moderne, ku veshjet e ftuarve – nga fustane të mëndafshta në tonet e perëndimit deri te kostume të rrepta minimaliste – flisnin në heshtje për shijen e epërme që mbushte ajrin.
Marc-Antoine, me një tuxedo të zi të prerë me saktësi arkitektonike, foli shkurtimisht para të ftuarve: “Ky parfum është një prekje shprese. Nuk është i komplikuar, por i ndjerë.”
Ishte një darkë ku shijet, aromat dhe stili nuk përplaseshin, por bashkëjetonin si yje në një galaktikë të përbashkët.
KAPITULLI VI: Elegancë, visione dhe ndjenja
Lansimi i Aldebaran nuk ishte vetëm një event mode, por një manifest modern mbi qasjen e njeriut ndaj shpresës dhe dritës. Në një botë ku errësira shpesh dominon, ky parfum është si një rreze e qartë, e rafinuar, e pamasë.
Në fund, Aldebaran, që mund ta gjeni në Maison de Parfum Prishtina dhe Maison de Parfum Tirana, mbetet më shumë se një aromë: është një vizion. Një kujtesë se edhe një lule e vetme mund të frymëzojë gjithë universin.
