Rasti i rëndë i Bleona Matës, vajzës nga Kukësi që u zhduk pa lënë gjurmë plot 15 vite më parë, është rikthyer sërish në qendër të diskutimeve publike pas një deklarate të bërë së fundmi në media. Në një intervistë për Report TV, avokatja Nexhmije Beqiri ka shpalosur detaje të reja të bazuara në rrëfimin e një dëshmitari, i cili pretendon se ka dijeni mbi fatin e vajzës.
Sipas avokates, e cila e njeh mirë dosjen, zhdukja dyshohet të ketë qenë një rrëmbim i organizuar nga persona të njohur të zonës dhe jo një humbje aksidentale në mal siç është aluduar shpesh ndër vite.
Sipas pretendimeve të bëra publike nga avokatja Beqiri, skenari i dyshuar përfshin dërgimin e Bleonës fillimisht në jug të vendit, specifikisht në fshatin Llakatun të Vlorës.
Aty thuhet se vajza i është dorëzuar vajzës së rrëmbyesit, e cila e kishte të pamundur të sillte në jetë fëmijë biologjikë.
Por itenerari nuk mbaron me kaq. Dëshmia vazhdon me largimin e familjes në fjalë drejt Greqisë vetëm tre muaj pas ngjarjes, për të përfunduar më pas në Gjermani, ku dyshohet se Bleona mund të ndodhet aktualisht. Ky informacion i ri, ndonëse mbetet për t’u verifikuar zyrtarisht nga prokuroria, rihap diskutimin mbi trafikimin e mundshëm dhe nevojën për hetime të mëtejshme ndërkombëtare. /Prive Bruto
