Familja Candan po përjeton një dhimbje të rëndë që pas humbjes së vajzës së tyre, Nihal (Gülnihal) Candan, e cila ndërroi jetë më 21 qershor 2025, në moshë shumë të re.
Nihal Candan u bë e njohur përmes paraqitjeve televizive dhe pranisë së saj në rrjete sociale, por prej kohësh vuante nga një çrregullim i të ngrënit – anoreksia nervoza. Sëmundja e çoi atë në humbje ekstreme të peshës, duke rënë deri në vetëm 23 kilogramë.
Gjendja e saj u përkeqësua aq shumë, sa u shtrua në spital dhe u trajtua në repartin e kujdesit intensiv. Mjekët raportuan se, pavarësisht përpjekjeve të tyre, zemra e saj ndaloi dhe nuk mundën ta shpëtonin. Lajmi i vdekjes së saj tronditi publikun dhe solli në vëmendje pasojat tragjike të anoreksisë.
Historia e saj u ndërlidh edhe me periudhën kur ajo dhe motra e saj u përfshinë në hetime ligjore dhe Nihal kaloi kohë në burg. Pikërisht gjatë kësaj kohe, shëndeti i saj u përkeqësua ndjeshëm dhe më vonë ajo u lirua me kusht për t’u trajtuar. Disa mjekë kanë ngritur dyshime se përveç anoreksisë, komplikacione serioze si “refeeding syndrome” – një gjendje e rrezikshme që ndodh kur një person me kequshqyerje të rëndë rifillon ushqyerjen – mund të kenë kontribuar në vdekjen e saj.
Vdekja e parakohshme e Nihal Candan ka hapur një debat të gjerë në Turqi për presionin e rrjeteve sociale mbi imazhin trupor, mungesën e mbështetjes së duhur për shëndetin mendor dhe rreziqet e çrregullimeve të të ngrënit.
Nëna Umut Candan dhe vajza tjetër, Su, vizitojnë shpesh varrin e saj. Në një nga këto vizita, Su u shtri mbi varrin e motrës, ndërsa nëna e tyre ndau një mesazh prekës:
“Sa prej jush janë të bukura, të mençura, të arsimuara, me karrierë, të mëshirshme dhe të dashura nga familja e tyre? Ju vetëm shtypët tastierat sa herë që shpërthyest nga xhelozia.”
View this post on Instagram
Nihal Candan mbetet një kujtim i dhimbshëm për familjen e saj dhe një histori e fortë paralajmëruese për shoqërinë. /Prive By Liberta Spahiu
