Pas buzëqeshjes së famshme dhe pjatave gjigante që e bënë të njohur në mbarë botën, kuzhinieri turk CZN Burak (Burak Özdemir) po përballet me një dramë familjare që ka tronditur publikun. Historia e tij nuk është më ajo e djalit të thjeshtë që gatuante për fansat në rrjete sociale, por e një figure që tashmë është zhytur në një konflikt gjyqësor me të atin, Ismail Özdemir, i cili sipas Burakut ka abuzuar me emrin e tij për përfitime marramendëse.
Sipas dokumenteve dhe deklaratave të vetë kuzhinierit, babai i tij ka nënshkruar marrëveshje në prapaskenë duke shitur të drejtat e markës “CZN Burak” pa dijeninë e tij. Shuma që përmendet është e frikshme – 41 milionë dollarë – para të cilat dyshohet se janë përfituar duke licencuar restorante dhe projekte në emrin e Burakut, por pa pëlqimin e tij. Pikërisht kjo e ka çuar yllin e rrjeteve sociale të hapë një proces gjyqësor për mashtrim dhe shfrytëzim të imazhit.
Përplasja nisi pas një momenti kritik: ndihmës për viktimat e tërmetit shkatërrues që goditi Turqinë. Burak kishte vendosur të shiste makinat e tij luksoze për të gjeneruar të ardhura dhe për të ndihmuar personalisht të prekurit. Por, sipas tij, babai ndërhyri për ta ndaluar, duke e bërë atë të kuptojë se marrëdhënia familjare ishte prishur në mënyrë të pakthyeshme. Kjo ndërhyrje ishte pika e fundit që e shtyu drejt gjykatës.
Nga ana tjetër, Ismail Özdemir ka dalë publikisht kundër djalit. Në një reagim mediatik, ai tha se “pa mua askush nuk do ta njihte Burakun” dhe e akuzoi atë se po përdor imazhin e nënës për të ushqyer një fushatë kundër tij. Ai shkoi aq larg sa të thotë se bamirësia e djalit ishte “thjesht propagandë” dhe se ndihma për tërmetin ishte shfrytëzuar si mjet marketingu.
Burak, i tronditur nga këto akuza, ka dalë publikisht duke sqaruar se nuk ekziston asnjë filial në Dubai në emrin e tij, duke i cilësuar të gjitha bizneset që operojnë atje me logon “CZN Burak” si mashtrime. Ai theksoi se aktualisht restorantet e tij gjenden vetëm në Katar dhe Taxhikistan dhe se në Istanbul ka vetëm një pikë që e menaxhon personalisht.
Ky konflikt ka bërë bujë në mediat turke, duke u kthyer në një “telenovelë” të vërtetë ku në qendër nuk është një serial i shkruar, por një betejë reale mes babait dhe djalit. Për më tepër, rasti pritet të ketë zhvillime të reja dramatike në gjykatë, meqë përballja ligjore do të përcaktojë fatin e markës “CZN Burak” dhe milionave që e shoqërojnë.
Saga që dikur dukej si histori suksesi familjar, sot është kthyer në një shembull të hidhur të asaj se si paratë, fama dhe biznesi mund të shkatërrojnë edhe lidhjet më të shenjta. Dhe ndërsa Burak vazhdon të buzëqeshë në videot e tij virale, realiteti i tij i përditshëm është një betejë e lodhshme për të rimarrë kontrollin e emrit dhe jetës së vet.
/Prive By Liberta Spahiu
