Ish-banorja e edicionit të dytë të Big Brother VIP Kosova, Alba Vukaj, sapo ka njoftuar një kapërcim të madh në karrierën e saj të modelingut. Bukuroshja shkodrane po lë pas tregun shqiptar për t’u zhvendosur në Azi, një lajm që e ka ndarë me ndjekësit përmes një postimi emocionues nga avioni, ku tregoi se po niset drejt një tregu gjigant.
“Dhe kështu fillon aventura,” shkroi Alba në fillim të postimit të saj, duke zbuluar se ka siguruar një marrëveshje mjaft të rëndësishme. “Kam nënshkruar një kontratë modelingu në Kinë për tre muaj me disa marka të njohura ndërkombëtarisht – një aventurë e re që mezi pres ta jetoj,” u shpreh ajo, duke mos e fshehur entuziazmin për këtë mundësi të artë ku tiparet e saj mesdhetare padyshim do të tërheqin vëmendje.
Përtej shkëlqimit që vjen me botën e modës dhe fushatat e reja, Alba zgjodhi të jetë tejet e sinqertë me ndjekësit për emocionet e përziera që sjell një ndryshim i tillë radikal i ambientit. Pasi theksoi se ndihet “jashtëzakonisht mirënjohëse” për rrugët që i janë hapur dhe “krenare me veten”, modelja tregoi edhe anën e cenueshme të kësaj eksperience.
“Pavarësisht frikës së vogël që mund të kem nga e panjohura e një vendi të ri, nga çdo derë e re që guxova të hap, lindi diçka e bukur, një dritë e vogël njohurie, një mësim që më rriti shpirtin,” theksoi ish-banorja e formatit, duke i dhënë kurajë vetes për sfidën që ka përpara.
Në fund, bukuroshja shtoi se mezi pret ta ndajë gjithë këtë përvojë me ndjekësit e saj. Tashmë mbetet për t’u parë se cilat do të jenë bashkëpunimet e para që do ta kenë atë si imazh, ndërsa sytë mbeten nga Kina për të parë sukseset e radhës së Albës. /Prive By Liberta Spahiu
