Një projekt i jashtëzakonshëm filmik është në përgatitje, me rrënjë në një nga këngët më të fuqishme të luftës në Kosovë.
Filmi me titullin provizor “Liberty Song” ka marrë dritën jeshile falë iniciativës së Benito Mares, një amerikan i njohur për mbështetjen e tij të palëkundur ndaj Kosovës.
Regjinë e filmit pritet ta marrë regjisori i njohur danez Peter Anthony, i cili në të kaluarën ka mahnitur me filmin “The Man Who Saved the World”, një projekt që bashkoi emra të mëdhenj të Hollywood-it si Kevin Costner, Robert De Niro, Matt Damon dhe Ashton Kutcher.
Por çfarë e bën këtë film kaq të veçantë?
“Liberty Song” bazohet në këngën emblematike të Leonora Jakupit, “A vritet pafajësia”, e cila gjatë vitit 1998 u kthye në një himn të rezistencës dhe sakrificës së grave kosovare në luftë. Këtë herë, jo burrat, por një grua dhe zëri i saj bëhen frymëzim për mijëra luftëtarë që i bashkohen betejës për liri.
Një narrativë ndryshe ku femra nuk është vetëm viktimë, por forcë, thirrje, dhe simbol heroizmi. Për këtë projekt është parashikuar një buxhet madhor, ndërsa këtë të diel, në ambientet e Hotel Swiss Diamond në Prishtinë, do të mbahet një konferencë për ngritje fondesh ku biznesmenë vendorë pritet të bëhen sponsorë e investitorë në realizimin e këtij filmi me përmasa globale.
Skenarin po e zhvillon Ardian Jasiqi ndërsa aktorë ndërkombëtarë pritet të jenë pjesë e kastit.
Nëse gjithçka shkon sipas planit, ky film mund të mos jetë thjesht një rrëfim i së shkuarës sonë – por një pretendent serioz për festivale ndërkombëtare dhe ndoshta, pse jo… për Oscar. /Prive By Liberta Spahiu
