Një nga gratë më të suksesshme në botën e muzikës dhe biznesit, Rihanna, ka pësuar një humbje marramendëse prej 36 milionë dollarësh nga linja e saj luksoze e veshjeve “Fenty Maison”, sipas bilanceve të reja financiare të kompanisë së saj britanike Denim UK Holdings.
Linja e modës, e cila u lançua në vitin 2019 në bashkëpunim me gjigantin francez të luksit LVMH, ishte një projekt historik — herën e parë që LVMH krijonte një markë të re nga e para që prej vitit 1987, dhe Rihanna u bë gruaja e parë me ngjyrë që drejtonte një “maison” brenda këtij konglomerati prestigjioz.
“Fenty Maison” u prezantua si një markë ready-to-wear me çmime të larta, ku një xhaketë xhinsi kushtonte rreth 1,000 dollarë dhe një fustan korse 810 dollarë. Por çmimet e larta rezultuan pengesë për shumicën e fansave të këngëtares, që janë mësuar me linjat më të arritshme si Fenty Beauty dhe Savage X Fenty.
View this post on Instagram
Goditjen përfundimtare e dha pandemia e COVID-19, e cila ndaloi udhëtimet dhe pengoi Rihannën të mbikëqyrte nga afër atelienë në Paris dhe prodhimin në Itali. Kjo ndërprerje e zinxhirit logjistik dhe mungesa e kontrollit artistik çuan në mbylljen e markës në fillim të vitit 2021.
Dokumentet financiare tregojnë se Rihanna investoi rreth 34.9 milionë dollarë, shumë të cilën LVMH e përputhi pothuajse në të njëjtën masë. Humbja totale prej 36 milionësh përfaqëson një dështim të kushtueshëm, por njëkohësisht edhe një mësim strategjik për sipërmarrësen miliardere.
Megjithatë, për Rihannën, kjo nuk është një goditje fatale. Ajo mbetet një biznesmene me pasuri që vlerësohet mes 1 dhe 1.4 miliardë dollarëve, falë suksesit të jashtëzakonshëm të Fenty Beauty dhe Savage X Fenty, që vijojnë të jenë marka me fitime marramendëse. Madje, sipas mediave ndërkombëtare, LVMH po shqyrton shitjen e 50% të aksioneve të saj në Fenty Beauty, me një vlerësim që mund të arrijë deri në 2 miliardë dollarë.
Edhe pse “Fenty Maison” nuk arriti të përballojë konkurrencën në botën e modës së lartë, mbyllja e saj tregon qartësinë dhe vendosmërinë strategjike të Rihannës për të fokusuar energjitë dhe kapitalin në sektorët që i sjellin sukses të garantuar.
Rihanna, tashmë një emër sinonim i fuqisë femërore dhe inovacionit në biznes, ka provuar se edhe një humbje milionëshe mund të kthehet në një hap drejt konsolidimit të një perandorie më të fortë. Me Fenty Beauty dhe Savage X Fenty që vazhdojnë të dominojnë tregun global, ylli nga Barbados mbetet një nga ikonat më të fuqishme të modës dhe biznesit modern. /Prive By Liberta Spahiu
