Lady Gaga së fundmi foli në një podcast të New York Times, për luftën me shëndetin mendor që e kaloi disa vite më parë.
Ajo tregoi se ka përjetuar një gjendje të rëndë mendore pesë vjet më parë dhe tha se në një moment “humbi kontaktin me realitetin”.
Ky rrëfim hedh dritë të re mbi vendimin e saj për të bërë një pushim të gjatë nga karriera e saj muzikore përpara publikimit të albumit të saj të fundit Mayhem.
Siç thotë ajo, shërimi ka qenë i gjatë dhe ka kërkuar vite të tëra punë të përkushtuar.
Një nga njerëzit më të rëndësishëm në procesin e saj të shërimit ishte Michael Polansky, i fejuari i saj, të cilin e takoi në vitin 2019.
Një nga sfidat më të mëdha të Gagës ishte pajtimi i personazhit të saj të skenës me jetën e saj private. Dallimi midis interpretueses intensive dhe energjike në skenë dhe dëshirës së saj personale për një jetë më të qetë dhe më të veçuar; ky ishte një burim i vazhdueshëm konflikti i brendshëm.
“Dua të mendoj se jam një person i mirë, por ka një egërsi, një ashpërsi dhe një intensitet në mua që e shpreh në skenë. Kështu që më duhej të mësoja se si t’i mbaja në ekuilibër këto dy anë të vetes”, shpjegoi artistja.
