Një histori sa njerëzore aq edhe prekëse po qarkullon gjerësisht në rrjetet sociale, duke treguar një anë tjetër të rrugëtimit të Rihanna-s.
Vite më parë, kur ajo ishte ende një vajzë e vogël që rritej në kushte të vështira në Barbados, një mësuese i bleu një palë këpucë në një moment kur ajo nuk kishte.
Vitet kaluan dhe Rihanna u shndërrua në një nga artistet më të suksesshme në botë, por bashkë me famën dhe pasurinë, ajo u dallua edhe për angazhimin e saj të palodhur në ndihmë të komuniteteve përmes nismave bamirëse dhe fondacionit të saj.
Duket se artistja nuk e harroi kurrë gjestin e dikurshëm; thuhet se vite më vonë, ajo i dhuroi mësueses së saj një shtëpi si një mënyrë për të kthyer mirësinë që kishte marrë.
Edhe pse jo çdo detaj i kësaj historie është konfirmuar zyrtarisht, ky rrëfim ka prekur miliona njerëz anë e mbanë botës.
Ndërkaq, përtej mesazheve frymëzuese, një ngjarje e rëndë ka tronditur së fundmi rezidencën e këngëtares në Los Angeles, ku ajo ka përjetuar momente paniku gjatë një sulmi me armë zjarri.
Sipas dëshmisë së saj, Rihanna ndodhej në një rimorkio në oborrin e shtëpisë kur dëgjoi zhurma të forta metalike, që më pas kuptoi se ishin të shtëna arme.
Ivanna Lisette Ortiz, 35 vjeçe, dyshohet se qëlloi rreth 20 herë me një armë gjysmëautomatike të tipit AR drejt shtëpisë së artistes në Beverly Crest, duke vënë në rrezik jetën e saj, të partnerit A$AP Rocky dhe tre fëmijëve të tyre të vegjël.
Sipas dokumenteve të gjykatës, prokuroria pretendon se Ortiz e kishte planifikuar sulmin me kujdes, duke përdorur madje edhe një paruke për t’u maskuar.
E akuzuara u paraqit në Gjykatën e Lartë të Los Angeles-it ku, përmes avokatit të saj, deklaroi pafajësinë.
Ndërkohë, kërkesa e saj për uljen e masës së sigurisë u kundërshtua prerë nga prokuroria, e cila e konsideron rastin jashtëzakonisht të rrezikshëm.
Fatmirësisht, nga ky incident i rëndë nuk pati të lënduar. /Prive By Liberta Spahiu
