Ajo që nisi si një diskutim i vazhdueshëm në mediat zvicerane, tani po merr formë nga vetë fjalët e reperes. Së fundmi, një video nga një bisedë e saj po bën xhiron e rrjetit dhe ka ngritur pikëpyetje të shumta te ndjekësit. Gjatë një bashkëbisedimi me Sami Delarue, Loredana u shfaq mjaft e sinqertë dhe dukshëm e lodhur nga presioni i jetës si artiste.
Në videon që po qarkullon kudo, ajo dëgjohet duke shprehur pasiguri për të ardhmen e saj në industri. Reperja pranoi hapur se nuk e di nëse dëshiron të bëjë më turne muzikore, duke theksuar se është konfuze për atë që dëshiron të bëjë më tej me karrierën.
Për më tepër, ajo nuk ngurroi ta quante industrinë e muzikës mosmirënjohëse, një deklaratë që tregon hapur zhgënjimin e saj aktual. Ndërkohë që bashkëbiseduesi përpiqet t’i shpjegojë se turnetë janë thjesht pjesë e pashmangshme e punës, Loredana duket qartësisht e lëkundur dhe e pavendosur.
Kjo tendencë për tërheqje nuk vjen krejtësisht e papritur. Prej kohësh, mediat në Zvicër kanë analizuar një distancim të mundshëm të Loredanës nga skena. Ajo ka folur vazhdimisht për betejat e saj me shëndetin mendor, ankthin dhe stresin që vjen nga të qenit pa pushim nën vëzhgimin e publikut dhe mediave.
Me një rrugëtim profesional që ka pasur suksese të mëdha por edhe përballje të forta me shtypin zviceran, duket se nevoja për qetësi personale po e sfidon dëshirën për të mbajtur ritmin e industrisë. A është herët për një lëvizje të tillë, apo tërheqja do të ishte vendimi i duhur? /Prive By Liberta Spahiu
