Presidenti Donald Trump dhe Zonja e Parë Melania mbërritën të martën në mbrëmje në Aeroportin Stansted të Londrës për një vizitë shtetërore dyditore në Mbretërinë e Bashkuar.
Air Force One u ul pak pas orës 21:00 (me orën lokale), ku ata u pritën nga Sekretarja e Jashtme britanike, Yvette Cooper, Ambasadori amerikan Warren Stephens dhe përfaqësuesi i mbretit, Viscount Hood. Më pas, çifti presidencial u nis me helikopterin Marine One drejt rezidencës së ambasadorit në Winfield House, Regent’s Park, ku do të qëndrojnë gjatë vizitës.
Në një deklaratë pas mbërritjes, Trump tha:
“Patëm një fluturim të mirë. E dua Turnberry-n, e dua Aberdeen-in… Kam gjëra këtu që më ngrohin zemrën.”
Për Mbretin Charles III shtoi:
“Do ta takojmë nesër. Është mik i imi prej kohësh, të gjithë e duan dhe e respektojnë.”
Por ajo që tërhoqi vëmendje ishte mungesa e qilimit të kuq gjatë zbritjes së tij në Londër – një detaj që shumë e konsideruan si fyerje. Në rrjet, qytetarët reaguan:
“Asnjë qilim i kuq për Trump! Vetëm pista dhe disa ushtarë.”
“Jo në përputhje me protokollin.”
“Turp për ty, Starmer!”
Megjithatë, besohet se kjo lidhet me faktin se pritja formale pritet të zhvillohet sot në Kalanë Windsor, ku Trump do të takohet me Mbretin Charles, Mbretëreshën, Princin William dhe Kate Middleton.
Pritja do përfshijë një fluturim ceremonial ushtarak, vizitë te varri i Mbretëreshës Elizabeth II, dhe një banket shtetëror me fjalime zyrtare.
Ndërkohë, vizita nuk kaloi pa incidente: protestues projektuan imazhe të Trump dhe Jeffrey Epstein mbi Kalanë Windsor, çka çoi në katër arrestime. /Prive By Liberta Spahiu
