Flora Kasapi, halla e këngëtarit të ndjerë Shpat Kasapi, ka dhënë një intervistë në emisionin “Living Day”, ku është ndalur gjerësisht te sulmet që i janë bërë bashkëshortes së Shpatit, Selvijes.
Pas humbjes tragjike të artistit, Selvija u përball me një valë kritikash dhe “kryqëzimi” në rrjetet sociale, situatë e cila ka revoltuar familjarët e të ndjerit.
Gjatë bisedës, Flora Kasapi u shpreh se dashuria apo urrejtja ndaj çiftit është një çështje krejtësisht personale, por kërkoi mirëkuptim njerëzor për tragjedinë që ndodhi. Ajo përshkroi momentin e rëndë të ikjes së Shpatit, duke theksuar se askush nuk mund ta shpjegojë dot dhimbjen kur një njeri “dy metra e i adhuruar nga të gjithë” ndërron jetë në krahët e partneres brenda pak sekondash.
Flora doli hapur në mbrojtje të Selvijes, duke e cilësuar trajtimin ndaj saj si një padrejtësi të madhe. Ajo kritikoi komentuesit në rrjet, duke pyetur se si ka mundësi që një popullatë e tërë flet për një person që nuk e njeh personalisht. “Nëse ai e ka zgjedhur për të dashurën e vet dhe për të qenë nëna e djalit të tij, si ka mundësi që të gjithë të flasin,” u shpreh ajo e revoltuar.
Në mbyllje të reagimit të saj, halla e këngëtarit mbështeti edhe qëndrimin e nënës së Shpatit, Zonjës Gjylysere. Ajo vlerësoi vendimin e kunatës së saj për t’u dhënë fund thashethemeve, duke i cilësuar kritikët si “goja haxhuze” që nuk duhen dëgjuar në këtë moment zie për familjen. /Prive By Liberta Spahiu
