Hailey Bieber ka treguar edhe një herë se është e gatshme për ndryshime të guximshme në stilin e saj.
29-vjeçarja ka prezantuar së fundmi përmes një “selfie” në Instagram modelin e saj më të ri të flokëve, një prerje e llojit “bob” e gjatë (long bob), e cila i jep një pamje tejet elegante dhe moderne. Flokët e saj brunë dhe të shndritshëm ishin stiluar me një ndarje të saktë në mes dhe me majat e kthyera lehtë sipër shpatullave, duke krijuar një volum natyral.
Ky ndryshim i pamjes nuk është i rastësishëm për themeluesen e “Rhode Beauty”. Kjo nuk është hera e parë që ajo zgjedh një prerje të shkurtër për sezonin e dimrit, duke kujtuar se edhe në janar të vitit 2023 ajo bëri një ndryshim të ngjashëm.
Në foton e fundit, ajo u shfaq me një veshje të zezë dhe një grim të lehtë, ku binin në sy buzët e lyera me laps, të cilat i jepnin më shumë volum portretit të saj.
Për Hailey-n, e cila është nëna e djalit 14-muajsh, Jack Blues, të cilin e ka me bashkëshortin e saj Justin Bieber, zgjedhja e një stili më të shkurtër lidhet ngushtë me jetën e saj të angazhuar. Në një intervistë për Vogue Italia, ajo shpjegoi se që kur u bë nënë, po kërkon gjëra që e bëjnë rutinën e saj të përditshme shumë më të thjeshtë dhe më praktike.
Modelja mbron fort filozofinë e saj të bukurisë “less is more” (më pak është më shumë). Ajo u shpreh se preferon një rutinë që zgjat vetëm 5 deri në 10 minuta, në mënyrë që të jetë gati për të përmbushur listën e gjatë të detyrave si biznesmene. Sipas saj, mjafton edhe vetëm larja e fytyrës për të bërë diferencën, pasi çdo gjë e thjeshtë është më mirë se asgjë. /Prive By Liberta Spahiu
