Që nga fundi i korrikut të shkuar, kur Argjira Spanca mes emocionesh njoftoi mbylljen e rrugëtimit të saj shtatë vjeçar me “She’s On Top” pikërisht në përfundim të sezonit televiziv, u fol jo pak mbi atë që do ta pasonte. Pas muajsh të tërë aludimesh dhe një karrigeje të nxehtë që mbeti bosh për ca kohë, pritjes më në fund i ka ardhur fundi dhe stafeta i ka kaluar një emri mjaft të njohur për publikun.
Sipas burimeve të “Koha Jonë”, drejtimi i edicionit të shtatë të formatit i është besuar askujt tjetër përveçse Sara Gjordenit. Ish-banorja e “Big Brother VIP”, e cila di gjithmonë se si të mbajë të ndezur vëmendjen e mediave, është parë së fundmi duke vulosur këtë rikthim të shumëpritur në ekran teksa firmoste kontratën krah Edi Manushit.
Për Sarën ky nuk është një terren i panjohur, pasi më herët ajo ka qenë pikërisht në karrigen e jurisë së këtij formati, ku spikati për elegancën dhe sinqeritetin e saj të pafiltruar.
Tani, pas eksperiencës televizive në “Vajzë apo Djalë”, ajo rikthehet si zonja e shtëpisë në pasarelë, tek rrënjët e saj të vërteta të modelingut. Ky duket të jetë padyshim viti i Sarës, e cila po dëshmon se mund t’i bëjë të gjitha me sukses. Krahas jetës si nënë e re, por me shpirt rebel dhe super e fokusuar tek karriera, ajo sapo ka bërë hapin e radhës në biznes duke lançuar “PRIME”, linjën e saj të produkteve të fytyrës dhe parfumeve, të kuruar në bashkëpunim me profesionistë të markave ndërkombëtare si Lancôme.
Gati për të marrë drejtimin dhe për të punuar me vajzat e reja të ekranit, mezi po presim të shohim frymën e re që Sara do të sjellë në këtë edicion. /Prive By Liberta Spahiu
