Vishwash Kumar Ramesh, një pasagjer britanik 40-vjeçar, është i vetmi i mbijetuar i tragjedisë ajrore të ndodhur më 12 qershor 2025, kur fluturimi AI171 i Air India u rrëzua menjëherë pas ngritjes nga aeroporti ndërkombëtar Sardar Vallabhbhai Patel në Ahmedabad, Indi.
Ky aksident ka shkaktuar vdekjen e 241 personave në bord dhe të paktën 28 të tjerë në tokë.
Ramesh, i cili ishte ulur në vendin 11A pranë daljes emergjente, ka shpëtuar nga rrënojat e fluturakës që shpërtheu në flakë pas përplasjes.
Në pamjet e shpërndara në media, ai shihet duke ecur qetësisht larg vendit të aksidentit, teksa fliste në telefon dhe dukej relativisht i paprekur nga katastrofa përreth tij.
Ai ka përjetuar disa lëndime të lehta dhe është duke u rikuperuar në spital.
Ekspertët e aviacionit e kanë cilësuar mbijetesën e tij si një “mrekulli”.
Ata sugjerojnë se vendndodhja e tij pranë daljes emergjente dhe mundësia që ai të jetë hedhur jashtë nga impakti i përplasjes mund të kenë kontribuar në shpëtimin e tij.
Një ekspert i aviacionit, Jeff Guzzetti, ka theksuar se dinamika e aksidenteve ajrore është e paparashikueshme, por pozita e Ramesh pranë daljes emergjente mund të ketë ndihmuar në evakuimin e tij të shpejtë.
Hetimet për këtë aksident janë duke u zhvilluar, me autoritetet që kanë rimarrë kutitë e zeza të aeroplanit për të përcaktuar shkakun e saktë të katastrofës.
Një raport paraprak pritet të publikohet brenda disa javësh. /Prive By Liberta Spahiu
