Në maternitetin “Mbretëresha Geraldinë” është shënuar një ngjarje e rrallë dhe plot emocion. Dhjetë mamitë e këtij institucioni, të cilat çdo ditë kujdesen me përkushtim për nënat dhe foshnjat, sot po përjetojnë vetë mrekullinë e shtatzënisë.
Nga duart që çdo ditë shpëtojnë jetë e mbajnë gjallë shpresën për shumë familje, këto gra tani mbajnë në zemrat e tyre bekimin më të madh – jetën brenda tyre. Ky moment i veçantë është një dhuratë që emocionon jo vetëm kolegët dhe pacientët, por edhe gjithë opinionin publik.
Në një postim të bërë publik nga vetë SUOGJ “Mbretëresha Geraldinë”, është ndarë fotoja e mamive të veshura me uniformë blu, të cilat qëndrojnë krenare para hyrjes së maternitetit, të gjitha me barkun e rrumbullakosur nga shtatzënia. Ky imazh prekës dhe i fuqishëm shndërrohet në simbol të ciklit të jetës dhe të përkushtimit që këto profesioniste kanë ndaj misionit të tyre.
“Një dhuratë e rrallë që na emocionon të gjithëve”, u shkrua në mesazhin e maternitetit, duke e cilësuar këtë rast si dëshmi të gjallë të mrekullisë së natyrës dhe të dashurisë për jetën. /Prive By Liberta Spahiu
