Sarajeva është tronditur nga vdekja e papritur e Adna Rovčanin-Omerbegović, vetëm 26 vjeçe, dy ditë pas dasmës së saj. Ngjarja e rëndë ka kthyer një ditë gëzimi në tragjedi dhe ka lënë të shokuar familjen, miqtë dhe gjithë opinionin publik.
Adna kurorëzoi dashurinë e saj më 13 shtator, në një hotel në Ilidža të Sarajevës, ku organizoi një dasmë plot hare dhe praninë e të afërmve. Vetëm disa orë më vonë, ajo nisi të ndihej keq papritur. Gjendja e saj shëndetësore u përkeqësua me shpejtësi, deri në humbjen e vetëdijes, duke e detyruar familjen ta dërgonte urgjentisht në Qendrën Klinike Universitare të Sarajevës.
Pavarësisht përpjekjeve të mjekëve, ajo ndërroi jetë më 15 shtator, vetëm dy ditë pas martesës. Ende nuk ka një njoftim zyrtar mbi shkakun e saktë të vdekjes, ndërsa në media janë përmendur disa mundësi, por asnjë nuk është konfirmuar nga mjekët.
Ceremonia e varrimit do të mbahet më 17 shtator, në varrezat “Bare” të Sarajevës, në orën 14:30, ku pritet të mblidhen shumë njerëz për t’i dhënë lamtumirën e fundit të resë që u nda nga jeta në kulmin e gëzimit të saj. Historia e Adnës ka prekur zemrat e të gjithëve, duke u kthyer në një kujtesë të dhimbshme se sa e brishtë mund të jetë jeta. /Prive By Liberta Spahiu
