Aktori Tom Holland është dërguar në spital pasi u lëndua gjatë xhirimeve të një skene me rrezik për filmin e ardhshëm Spider-Man, që po xhirohet aktualisht.
Tom Holland po xhiron pjesën e katërt të serisë së tij me Spider-Man, me titullin “Spider-Man: Brand New Day”.
Më herët këtë vit, disa foto nga seti i xhirimeve u publikuan në rrjetet sociale, ku shihej se disa skena po xhiroheshin në Mbretërinë e Bashkuar.
Thuhet se Holland ka pësuar një goditje në kokë pas një rrëzimi dhe është trajtuar për një tronditje cerebrale më 19 shtator, gjatë xhirimeve në Leavesden Studios në Watford, Britani e Madhe.
Pas incidentit, xhirimet për atë ditë janë ndërprerë.
Një zëdhënës i Shërbimit të Ambulancës të Anglisë Lindore i tha gazetës The Sun për incidentin:
“U thirrëm në orën 10:30 të mëngjesit të së premtes për të ndihmuar një pacient që kishte pësuar një lëndim në Leavesden Studios, në Watford.
Një ambulancë u dërgua në vendngjarje dhe pacienti u transportua në spital për trajtim të mëtejshëm.”
Babai i Holland-it, komediani Dominic Holland, foli gjithashtu për lëndimin në një darkë bamirësie, duke thënë se djali i tij do të bëjë një pushim nga xhirimet “për pak kohë”.
Tom Holland ishte i pranishëm në atë darkë, së bashku me të fejuarën e tij, Zendaya, por thuhet se është larguar herët për shkak se nuk ndihej mirë.
Nuk është e qartë se si do të vazhdojnë xhirimet pa Holland-in, apo nëse kjo do të ndikojë në datën e publikimit të filmit, e cila është planifikuar për korrik 2026.
Para se të fillonin xhirimet, Holland kishte shprehur entuziazmin e tij për këtë kapitull të ri, pavarësisht thashethemeve se “Spider-Man: No Way Home” mund të ishte paraqitja e tij e fundit si superheroi ngjitës.
Në një intervistë për Complex, ai tha:
“Ka qenë një proces shumë argëtues zhvillimi i filmit.
Është hera e parë që më kanë lejuar të marr pjesë në këtë pjesë të procesit, dhe është padyshim një përvojë stresuese. Por tani që kemi nisur xhirimet, po xhirojmë material të shkëlqyer.”
Ai shtoi:
“Është një fillim i ri, nuk ndjehet sikur po bëjmë filmin e katërt, por si të ishte filmi i parë i një kapitulli të ri.
Është një rilindje. Diçka krejtësisht e re.”
Holland gjithashtu ka bërë kërkime të fshehta për të kuptuar se çfarë presin fansat nga filmi i ardhshëm, duke ndjekur reagimet ndaj filmave të mëparshëm.
Kasti i filmit “Brand New Day” përfshin rikthimin e Holland, Jacob Batalon dhe Zendaya, si dhe emra të rinj si aktorja e “Stranger Things”, Sadie Sink. /Prive By Liberta Spahiu
