Sot, më 1 tetor, nis Muaji i Ndërgjegjësimit për Kancerin e Gjirit, i njohur ndryshe edhe si “Muaji Rozë”, një periudhë ku në mbarë botën përqendrohet vëmendja te parandalimi, diagnostikimi i hershëm dhe mbështetja për gratë që përballen me këtë sëmundje.
Kanceri i gjirit është forma më e përhapur e kancerit tek gratë dhe një ndër shkaqet kryesore të vdekjeve. Statistikat tregojnë se një në tetë gra gjatë jetës së saj përballet me kancer gjiri, ndërsa çdo vit regjistrohen miliona raste të reja. Megjithatë, ekspertët theksojnë se zbulimi në fazat e hershme mund të shpëtojë jetë dhe të rrisë ndjeshëm shanset për shërim.
Kontrolli është çelësi
Mjekët këshillojnë që çdo grua, pavarësisht moshës, duhet të jetë e kujdesshme dhe të kontrollojë shëndetin e saj rregullisht:
Vetëkontrolli mujor: rekomandohet që gratë të mësojnë si të kryejnë vetëkontrollin e gjirit, për të vënë re çdo ndryshim të pazakontë.
Vizitat tek mjeku: një kontroll rutinë tek mjeku gjinekolog ose onkolog mund të bëjë diferencën.
Mamografia: pas moshës 40 vjeç, ose edhe më herët nëse ka raste të ngjashme në familje, mamografia bëhet një mjet thelbësor për zbulimin e hershëm.
Më shumë se shëndet fizik
Ky muaj është gjithashtu një mesazh solidariteti dhe force për të gjitha gratë që janë në betejë me këtë sëmundje. Shoqatat, organizatat shëndetësore dhe komunitetet në mbarë botën organizojnë aktivitete për të kujtuar se askush nuk është vetëm në këtë rrugëtim. Shiriti rozë, simboli i këtij muaji, është shenjë e mbështetjes dhe unitetit.
Mesazhi për të gjithë
Tetori na rikujton një gjë të thjeshtë por të fuqishme:
Shëndeti është pasuria më e madhe që kemi. Të kontrollohemi, të qëndrojmë gati dhe të mos neglizhojmë sinjalet që trupi na jep.
Vetëm duke i qëndruar vetes pranë, duke bërë kontrollet e nevojshme dhe duke folur hapur për këtë temë, mund të shpëtojmë jetë – ndoshta edhe tonën. /Prive By Liberta Spahiu
