Ngjarja e rëndë që tronditi Shqipërinë, ku gjyqtari Kalaja u vra brenda në sallën e gjyqit, ka shkaktuar reagime të shumta. Ndër personazhet publikë që janë prekur nga kjo ngjarje është edhe prezantuesja e njohur, Orinda Huta, e cila ka ndarë për herë të parë një përvojë shumë personale lidhur me drejtësinë.
Në një postim emocional në Instagram, Orinda shkroi se ndien tronditje jo vetëm për aktin në vetvete, por edhe për mënyrën si njerëzit e kanë pritur. “Vrasja e tmerrshme e gjyqtarit është kambanë alarmi jo vetëm për ngjarjen, por edhe për reagimin e njerëzve më pas. Nuk e besoj dot që njerëzit duartrokasin një veprim kafshëror”, shkruan ajo.
Ajo rrëfen se është vetë pjesë e një procesi gjyqësor që po zgjat prej 15 vitesh, pa gjetur ende zgjidhje. “Zoti e di sa do zgjasë se akoma s’ka kaluar në shkallë të parë, jemi ende me shtetin. Por janë tokat e mamës time dhe do i marr njësoj siç i takojnë të gjithë pjesëtarëve”, tregon prezantuesja.
Në vijim, Orinda zbulon se gjatë këtyre viteve ka marrë edhe kërcënime: “Në këto vite kam marrë shpesh kërcënime nga të ashtuquajtur ‘daja’, pse po kërkoja të drejtën e familjes time.”
Megjithatë, ajo e bën të qartë se pavarësisht frustrimit që sjellin proceset e pafund gjyqësore, dhuna nuk mund të jetë kurrë përgjigje. “E njoh mirë frustrimin e proceseve të gjata pafund, por që të biesh dakord me krimin e ta vlerësosh… ky është fundi”, përfundon Orinda me tone të forta reflektimi.
Një reagim që tregon jo vetëm ndjeshmërinë e saj ndaj një ngjarjeje tronditëse, por edhe forcën e një gruaje që ka kaluar vetë përmes sfidave të sistemit të drejtësisë. /Prive By Liberta Spahiu.
