Sipas mediave ndërkombëtare, themeluesi i markës së njohur të modës Mango, Isak Andic, humbi jetën në dhjetor të vitit 2024 në rrethana tragjike, ndërsa po shëtiste me djalin e tij në malet Montserrat në Spanjë, dhe i biri i tij, Jonathan Andic, aktualisht është vënë nën hetim në lidhje me vdekjen e të atit.
Isak, i cili ishte 71 vjeç, ndërroi jetë më 14 dhjetor 2024, pas një aksidenti, sipas deklaratës që më parë kishte lëshuar drejtori ekzekutiv i Mango-s, Toni Ruiz.
Ai ishte duke bërë hiking me djalin e tij të madh, Jonathanin, 44 vjeç, kur ra nga një lartësi prej më shumë se 100 metrash, sipas raportimeve të gazetës britanike The Times.
Ngjarja ndodhi në shtegun malor Les Feixades, një rrugë e njohur për turistët dhe familjet afër Barcelonës. Jonathan, që po ecte përpara, ka treguar se dëgjoi zhurmën e gurëve që binin dhe më pas pa të atin të rrëzohej nga një pjesë e pa-rrethuar e shtigjeve.
Fillimisht, policia e cilësoi rastin si aksident, por më vonë, për shkak të disa mospërputhjeve në dëshminë e Jonathanit, u vendos që çështja të rishikohej gjyqësisht, raportojnë El Periódico dhe El País.
Sipas mediave spanjolle, hetimi është zhvendosur nga një aksident malor në një dyshim për vrasje, dhe statusi i Jonathanit është ndryshuar nga dëshmitar në të dyshuar.
Policia katalanase Mossos d’Esquadra po analizon të gjitha provat, përfshirë përmbajtjen e telefonit të tij. Megjithatë, burime brenda policisë kanë theksuar se pista kryesore e hetimit mbetet ajo e aksidentit, pasi deri tani nuk është gjetur asnjë provë që të tregojë të kundërtën.
Një përfaqësues i policisë ka bërë të ditur për median amerikane PEOPLE se hetimi është nën rishikim gjyqësor dhe për momentin mbetet i mbyllur për publikun.
Ndërkohë, familja Andic ka mbajtur qëndrimin se Jonathan është i pafajshëm.
Përmes një deklarate që u publikua nga Reuters, familja bëri të ditur se nuk do të komentojë mbi vdekjen e Isak Andic, duke kërkuar respekt për procesin gjyqësor në vijim.
Ata kanë shprehur besimin se hetimi do të përfundojë së shpejti dhe se pafajësia e Jonathanit do të vërtetohet.
Jonathan Andic, i cili mban postin e nënkryetarit të bordit drejtues të Mango Fashion Group, nuk ka dhënë asnjë deklaratë publike, ashtu si edhe vetë kompania.
Në një reagim zyrtar pas ngjarjes, drejtori ekzekutiv i Mango-s, Toni Ruiz, tha se kompania njofton me keqardhje të thellë vdekjen e papritur të themeluesit të saj, Isak Andic, i cili humbi jetën në një aksident.
Ai e përshkroi Isakun si një njeri me vizion të jashtëzakonshëm, udhëheqës frymëzues dhe të përkushtuar ndaj vlerave që vetë kishte ndërtuar në kompani.
Ruiz shtoi se vdekja e tij lë një boshllëk të madh, por trashëgimia që ai la pas do të mbetet përherë pjesë e Mango-s dhe e njerëzve që punojnë aty.
Ai theksoi se mënyra më e mirë për ta nderuar është që kompania të vazhdojë të ecë përpara ashtu siç do ta kishte dëshiruar vetë Isaku.
Sipas Forbes, në kohën e vdekjes, Isak Andic kishte një pasuri prej rreth 4.5 miliardë dollarësh. Ai hapi dyqanin e parë Mango në Barcelonë në vitin 1984, duke e kthyer më pas markën në një nga gjigantët globalë të modës.
Sot, Mango numëron mbi 2,900 dyqane në të gjithë botën dhe vetëm në gjysmën e parë të vitit 2025 ka regjistruar një rritje prej 12% të shitjeve dhe 78 dyqane të reja të hapura. /Prive By Liberta Spahiu
