Një prej bashkëpunimeve më të bujshme të botës së bukurisë ka përfunduar mes polemikash. Brendi i famshëm “Huda Beauty” ka njoftuar se ka ndërprerë menjëherë çdo lidhje me ish-konkurenten e “Love Island USA”, Huda Mustafa, pas një skandali që shpërtheu në rrjete sociale dhe që lidhet me përdorimin e një termi racor gjatë një transmetimi live.
Gjithçka nisi pas një videoje që u bë virale në “X” (Twitter), ku Huda Mustafa shihet duke qeshur gjatë një bisede “live” në Instagram, në momentin kur një zë tjetër në telefon përdor një fjalë të rëndë raciste ndaj konkurrentes së saj të dikurshme në reality show, Olandria Carthen. Reagimi i saj – apo më saktë, mungesa e tij – u pa si miratim i ofendimit, dhe zemëroi ndjekësit.
Pas presionit publik, kompania “Huda Beauty”, e themeluar nga influencuesja e famshme Huda Kattan, doli me një njoftim të qartë:
“Në zemrën e gjithçkaje që bëjmë qëndron mirësia dhe njerëzimi. Fatkeqësisht, një nga bashkëpunëtorët tanë ka shfaqur sjellje që nuk përputhen me vlerat tona. Si rrjedhojë, bashkëpunimi është ndërprerë menjëherë.”
Brendi bëri të ditur se të gjitha përmbajtjet, fotot dhe videot që lidhen me Mustafa-n do të fshihen nga platformat e tyre dhe nga dyqanet partnere.
Pas reagimeve të ashpra, Huda Mustafa publikoi një letër publike ndjese, duke pranuar se reagimi i saj ishte “i papërshtatshëm” dhe se “nuk përfaqësonte qëndrimet e saj personale”.
“Ishte një moment i keqvendosur, për të cilin jam thellësisht e penduar. Nuk e mbështes dhe nuk do të mbështes kurrë gjuhën raciste,” shkroi ajo, duke njoftuar gjithashtu një donacion për organizatën amerikane NAACP, që lufton diskriminimin racial.
Nga ana tjetër, Olandria Carthen reagoi përmes një “story” në Instagram ku shkroi:
“Fjalët si këto bartin një histori dhimbjeje që shkon përtej individit. Të heshtësh është të jesh pjesë e problemit. Të flasësh është minimumi.”
Ndërkohë, rrjeti është përçarë: një pjesë e fansave të Huda Mustafës kërkojnë falje për të, ndërsa të tjerë e akuzojnë për mungesë ndjeshmërie dhe për përfitim nga imazhi i viktimës.
Ky rast ka vënë edhe një herë në qendër të vëmendjes përgjegjësinë publike të influencuesve dhe mënyrën se si kompanitë reagojnë për të ruajtur imazhin e tyre në epokën e rrjeteve sociale.
Për momentin, as Huda Kattan dhe as Huda Mustafa nuk kanë dalë në ndonjë deklaratë të përbashkët. Por, ajo që është e sigurt është se emri “Huda” – dikur simbol suksesi në botën e bukurisë – tani është bërë subjekt i një prej polemikave më të mëdha të këtij viti.
/Prive By Liberta Spahiu
