Një zbulim i madh shkencor po jep shpresë për miliona njerëz në mbarë botën që vuajnë nga rënia e flokëve.
Studiuesit në Universitetin Kombëtar të Tajvanit kanë zhvilluar një serum të ri, i cili sipas rezultateve të para rikthen rritjen e flokëve për vetëm 20 ditë.
Rënia e flokëve prek mbi 80 milionë njerëz vetëm në SHBA, ndërsa forma më e zakonshme, alopecia androgjenetike, shfaqet kryesisht tek meshkujt. Statistikat tregojnë se dy të tretat e burrave përballen me rënie flokësh deri në moshën 35-vjeçare, dhe kjo shifër rritet në 85% pas moshës 50 vjeç.
Derisa shumëkush ka zgjedhur transplantin e flokëve si zgjidhje, kjo procedurë mbart rreziqe si infeksione, irritim, plagëapo moskënaqësi estetike. Por me zbulimin e ri, ndërhyrjet kirurgjikale mund të bëhen të panevojshme.
Në studimin e publikuar në revistën “Cell Metabolism”, shkencëtarët tregojnë se serumi i ri, i përbërë nga acide yndyrore natyrale, ndihmon në stimulimin e qelizave dhjamore në lëkurë, të cilat më pas rigjenerojnë folikulat e flokëve.
Profesori Sung–Jan Lin, autor i studimit, tha për New Scientist se ka qenë aq i bindur për efektin e produktit, sa e ka provuar vetë:
“E aplikova këtë serum me acide yndyrore në këmbët e mia për tre javë, dhe vura re se flokët filluan të rriteshin përsëri,” – tregoi ai.
Eksperimenti u zhvillua fillimisht te minjtë, ku brenda 10 ditëve filluan të rriteshin flokë të rinj në zonat e trajtuara. Ndërkohë, asnjë ndryshim nuk u vu re në zonat që nuk u trajtuan me serumin.
Sipas studiuesve, procesi funksionon duke aktivizuar qelizat imunitare, të cilat nxisin lëshimin e acideve yndyrore që përthithen nga qelizat e rrënjës së flokëve – duke stimuluar rritjen e re.
Për të shmangur irritimin e lëkurës, ekipi krijoi një version më të butë të serumit, pa përbërës kimikë, i cili dha rezultate të ngjashme dhe pa efekte anësore.
Faza e ardhshme e kërkimeve do të përfshijë testime te njerëzit, për të përcaktuar dozimin dhe efektivitetin afatgjatë.
“Rezultatet tona tregojnë potencial të madh që ky serum të kthehet në një trajtim të sigurt dhe efektiv për rënien e flokëve në të ardhmen,” – përfunduan autorët e studimit. /Prive By Liberta Spahiu
