Lidhja e futbollistit të famshëm francez, Benjamin Pavard, dhe modeles shqiptare nga Kosova, Kleofina Pnishi, mbetet një nga më të komentuarat. Çifti shpreh vazhdimisht dashurinë dhe mbështetjen për njëri-tjetrin, por Pavard ka gjetur një mënyrë shumë të veçantë për ta bërë këtë, duke nderuar edhe prejardhjen e partneres së tij.
Pas përfundimit të ndeshjes së mbrëmshme mes skuadrës së tij, Olympique de Marseille, dhe RC Lens (e cila u mbyll 0-0), Pavard ka dërguar një përshëndetje speciale drejt tribunës ku ndodhej Kleofina.
Vetë modelja ka qenë ajo që ka kapur momentin dhe e ka ndarë me ndjekësit në Instagramin e saj. Në foton e postuar në “story”, shihet qartë mbrojtësi francez në fushën e blertë duke bërë me duar simbolin e shqiponjës dykrenare.
Ky gjest duket se është kthyer tashmë në “përshëndetjen e tyre private” në publik. Edhe pse i rrethuar nga lojtarë të tjerë dhe stafi, sytë e Pavard duket se ishin te Kleofina, duke i dërguar një mesazh të qartë dashurie.
Kujtojmë se kjo nuk është hera e parë që kampioni i botës me Francën bën këtë gjest. Ai bëri bujë të madhe në Shtator kur festoi golin e tij të parë me Marseille pikërisht me simbolin e shqiponjës, një dedikim i hapur për Kleofinën, duke u bërë kryelajm në mediat shqiptare.
Tashmë, ky simbol e shoqëron atë rregullisht, duke treguar lidhjen e fortë të çiftit. /Prive By Liberta Spahiu
