Të gjithë e njohim për humorin e tij si “Hamdiu” në serialin e popullarizuar “Çka ka shpija”, por sot aktori Dardan Gashi është shfaqur siç nuk e kemi parë kurrë më parë: i lënduar dhe i acaruar.
Një ngjarje skandaloze ka ndodhur sot në sheshin “Zahir Pajaziti” në Prishtinë, ku viktima të një sulmi të shëmtuar verbal kanë qenë bashkëshortja e aktorit dhe djali i tij i vogël 9-vjeçar.
Ofendime për gruan me shami dhe Profetët
Gashi ka rrëfyer përmes një postimi që ka shokuar rrjetin se si një moment gëzimi për festën e 28 Nëntorit u kthye në makth.
Djali i tij preku aksidentalisht një kalimtar, dhe kaq mjaftoi që personi në fjalë të shpërthente në ofendime banale ndaj gruas së aktorit, vetëm sepse ajo ishte e mbuluar me shami.
“Një prekje e pafajshme e një fëmije… dhe kjo mjaftoi që ky tip i sëmurë nga islamofobia të shpërthente në ofendime,” shkruan aktori i revoltuar.
Ai tregon se personi nuk kurseu asgjë, duke ofenduar rëndë edhe profetët Muhamed dhe Jezus në mes të sheshit.
Paralajmërimi i frikshëm i aktorit: “Më ka hipur gjaku në kokë”
Deklarata më e fortë e Gashit është ajo ku lë të kuptohet se nëse do të ishte prezent fizikisht, situata do të kishte eskaluar në dhunë ekstreme për të mbrojtur nderin e familjes.
“Falenderoj Allahun që nuk e kam takuar unë përballë. Sot lajmet ndoshta do të raportonin për një Dardan që as familja, as shoqëria nuk e kishte njohur ‘ashtu’. I mbushur me mllef vendosa të shprehem publikisht,” deklaron Gashi.
Gashi akuzon “koka boshe”
Aktori nuk e ka lënë me kaq, por ka drejtuar gishtin nga ata që ai i quan nxitës të urrejtjes ndaj muslimanëve në Kosovë, duke përmendur “Lëvizjen e Deçanit” dhe figura publike si Blerim Latifi, që sipas tij po “ushqejnë koka bosh me urrejtje”.
Postimi mbyllet me një betim të fortë, ku aktori i “Çka ka shpija” thotë se në damarët e tij qarkullon gjak patriotësh si Shaban Polluzha, duke paralajmëruar se mbrojtja e familjes për të është mbi gjithçka. /Prive By Liberta Spahiu
