Ndarja nga jeta e babait të këngëtarit Shpat Kasapi ka sjellë një situatë të diskutueshme në rrjet, lidhur me atë se kush mundësoi kthimin e shpejtë të trupit në vendlindje.
Siç dihet, procedurat për riatdhesimin e trupave nga Italia shpesh janë burokratike dhe mund të zgjasin disa javë. Pikërisht këtu ka qenë edhe thelbi i ndihmës së ofruar për familjen Kasapi, që ceremonia të kryhej sa më parë.
Familja e këngëtarit falënderoi publikisht Igli Taren, një figurë me ndikim dhe lidhje të forta në shtetin fqinj, duke lënë të kuptohet se ndërhyrja e tij shmangu pritjen e gjatë.
Ndërhyrja e hoxhë Ahmed Kalasë
Megjithatë, hoxha i njohur Ahmed Kalaja ka ndjerë detyrim moral të saktësojë situatën përmes një postimi në Instagram. Ai ka publikuar një foto me biznesmenin Mariglen Shehaj, duke ia atribuuar atij meritën kryesore për zgjidhjen e këtij halli.
Sipas Kalasë, mediat nuk kanë pasqyruar të vërtetën e plotë. Ai thekson se ishte Shehaj ai që mbuloi transportin dhe shpenzimet, duke bërë të mundur që trupi të mos mbetej peng i procedurave që do të merrnin javë të tëra.
“Vëllai ynë Mariglen Shehaj është marrë me të gjitha shërbimet… si edhe transportimin e tij për në Tetovë,” shkruan hoxha, duke shtuar se ndërsa nuk mohon kontributin e të tjerëve për efekte proceduriale, barra kryesore materiale dhe logjistike ka rënduar mbi mikun e tij.
Reagimet: Bamirësi apo reklamë?
Postimi ka ndarë ndjekësit në dy kahe. Ndërsa disa vlerësojnë transparencën dhe gjestin e Shehajt, shumë të tjerë kanë kritikuar ashpër hoxhën në seksionin e komenteve.
“A e bëri për hir të Zotit apo për me postu këtu?” pyet një ndjekës, ndërsa të tjerë shprehen se në momente morti, “lufta” për merita se kush e solli trupin më shpejt nga Italia është e pavend dhe cenon dinjitetin e dhimbjes së familjes. /Prive By Liberta Spahiu
