Një ngjarje pa precedent ka tronditur organizatën e “Miss Finlanda”, duke çuar në shkarkimin e menjëhershëm të fitueses së këtij viti, Sarah Dzafce. Bukuroshja 22-vjeçare, e cila ka rrënjë shqiptare nga ana e babait, është bërë e para “Miss” në historinë e kompeticionit që zhvishet zyrtarisht nga titulli, një masë drastike që nuk ishte marrë kurrë më parë në këtë formë.
Fotoja “fatale” që ndezi rrjetin
Gjithçka nisi më 1 dhjetor, kur tabloidi finlandez Ilta-Sanomat (IS) raportoi mbi një foto të Sarah-s që po qarkullonte me shpejtësi në rrjetet sociale (kryesisht Snapchat dhe Instagram). Në imazh, Dzafce shfaqet duke tërhequr sytë me gishta për t’i bërë ata të duken të pjerrët – një gjest që ndërkombëtarisht njihet si tallës ndaj tipareve aziatike.
Fotoja shoqërohej me mbishkrimin në finlandisht: “Kiinalaisenkaa syömäs” (Duke ngrënë me një kinez/ushqim kinez). Ky postim u cilësua menjëherë si racist dhe ofendues, duke shkaktuar një valë indinjate publike që organizata nuk mund ta injoronte.
Vendimi i vështirë dhe reagimi i Sarah
Të enjten pasdite, CEO e “Miss Finlanda”, Sunneva Sjögren, doli në një konferencë për shtyp duke njoftuar se pas një shqyrtimi të kujdesshëm, organizata kishte marrë vendimin e “arsyetuar dhe të vështirë” për t’i hequr kurorën.
Sarah Dzafce, e cila më herët kishte deklaruar me krenari në bio-n e saj se “rrënjët e mia janë në malet e Kosovës”, u shpreh e shokuar për vendimin. “Nuk e prisja të ndodhte. E mora vesh këtë mëngjes, por vendimin e morëm me pëlqim reciprok,” tha ajo për mediat vendase, duke e cilësuar foton si një “keqkuptim” dhe një shaka të pasuksesshme, por dëmi tashmë ishte i pariparueshëm.
View this post on Instagram
Një rast historik: Pse ky rast ndryshon nga të tjerët?
Heqja e titullit të Sarah Dzafces shënon një kthesë historike. Ajo është e para që shkarkohet nga organizata.
Në vitin 2011, Miss Finlanda Pia Pakarinen hoqi dorë nga titulli, por ajo e bëri këtë me dëshirën e saj, duke dhënë dorëheqjen live në TV për shkak të pakënaqësive me pagesat dhe menaxhimin.
Në vitin 1995 dhe 1997, dy shoqëruese të para humbën titujt për skandale nudo ose të kaluarën e tyre, por asnjëherë më parë vetë fituesja kryesore nuk ishte pushuar nga titullinë këtë mënyrë.
Ky skandal ka hapur një debat të gjerë në Finlandë mbi racizmin dhe përgjegjësinë e personazheve publike, ndërsa ëndrra e vajzës me origjinë nga Kosova për të përfaqësuar Finlandën në “Miss Universe” u pre në mes. /Prive By Liberta Spahiu
