Që prej ditës së djeshme, rrjeti “gëlonte” nga video virale ku Vrenozi shfaqej duke u përlotur dhe duke u përshëndetur me familjarët e tij, nën pretekstin se do të nisej për në “Big Brother”. Duke njohur natyrën e tij satirike dhe videot e shpeshta me skenarë humori, ndjekësit ishin të ndarë në dy kampe: ata që e besonin dhe ata që mendonin se kjo ishte thjesht “bëma” e radhës e korçarit për të marrë vëmendje.
Por, burime të sigurta pranë “Prive by Liberta Spahiu” kanë konfirmuar ekskluzivisht se gjithçka është e vërtetë. Ilir Vrenozi është izoluar dhe nesër pritet të kalojë pragun e shtëpisë së BBVA 5, duke premtuar se do të jetë një nga personazhet më dinamikë të këtij edicioni.
Futja e tij pritet të ndryshojë balancat në shtëpi, duke sjellë humorin tipik korçar, por edhe debate të forta, duke marrë parasysh natyrën e tij të drejtpërdrejtë dhe pa filtra
Kush është Ilir Vrenozi? Nga kritiku “i tërbuar” i qeverisë, te “kafeja” me Edi Ramën
Për ata pak njerëz që mund të mos e njohin, Ilir Vrenozi nuk është thjesht një personazh i zakonshëm i TikTok-ut apo Facebook-ut. Ai është kthyer në një simbol të “zërit të popullit” (shpeshherë në mënyrë komike) dhe njihet si “demokrati më i famshëm” i Korçës.
Si u bë i famshëm? Vrenozi fitoi popullaritet fillimisht përmes videove të regjistruara në rrugët e Korçës ose në shtëpinë e tij, ku me një dialekt karakteristik dhe plot pathos, kritikonte qeverinë, rritjen e çmimeve dhe realitetin shqiptar. “Marka” e tij u bënë reagimet epike ndaj lajmeve politike, shpesh duke përfunduar me shprehje që u bënë virale në rrjet.
Kulmi i famës së tij mediatike arriti kur kritikat e tij të vazhdueshme tërhoqën vëmendjen e vetë Kryeministrit Edi Rama.
Rama e telefonoi personalisht Vrenozin, një moment që u bë viral, duke e ftuar për kafe ose në podkastin e tij.
Vrenozi fillimisht mbajti qëndrim stoik prej “opozitari të flaktë”, duke deklaruar se: “Unë nuk shitem për një kafe, do ha groshë gjithë jetën, por bindjet nuk i ndërroj!”. Megjithatë, takimi ndodhi. Rama shkoi në Korçë dhe u takua me kritikun e tij më të madh. Ajo që pasoi ishte një bisedë miqësore, batuta për raki e politika, dhe një “paqe” e përkohshme që shkaktoi shumë zhurmë. Shumë ndjekës e akuzuan Vrenozin se “u zbut”, ndërsa të tjerë e panë si një moment civilizimi mes dy poleve të kundërta.
Tashmë, mbetet për t’u parë: A do ta ruajë Vrenozi strategjinë e tij të “popullit të thjeshtë” brenda shtëpisë luksoze, apo do të shohim një anë tjetër të korçarit që trazoi politikën me humorin e tij? /Prive By Liberta Spahiu
View this post on Instagram
