Festat e fundvitit kanë marrë një ngjyrim tjetër emocionues me projektin më të ri muzikor të këngëtares së njohur Yllka Kuqi.
Ajo ka bërë bashkë forcat me njeriun e saj më të shtrenjtë, babanë Zeqe Kuqi, për të sjellë një kolazh këngësh të titulluar “Potpuria 1”.
Ky bashkëpunim vjen si një përmbyllje e bukur e vitit dhe një ogur i mirë për fillimin e ri.
Projekti është një gërshetim i përsosur i traditës dhe profesionalizmit, ku zëri i ëmbël i Yllkës bashkohet me eksperiencën dhe interpretimin dinjitoz të babait të saj. Ky nuk është bashkëpunimi i tyre i parë, por padyshim mbetet një nga më të veçantët, pasi përcjell ngrohtësinë familjare që të gjithë kërkojnë gjatë festave të dhjetorit.
Në videoklipin e publikuar, dyshja shfaqet me një elegancë të kuruar, në një ambient festiv që përshkohet nga dritat dhe shkëlqimi i fundvitit.
Ky projekt pritet të jetë shoqëruesi kryesor i tryezave festive të shqiptarëve kudo që ndodhen natën e sotme. /Prive By Liberta Spahiu
