Ndonjëherë idetë më të thjeshta janë ato që rezultojnë më fitimprurëset. Këtë e vërteton më së miri rasti i një videoje në YouTube, e cila, edhe pse nuk ka asnjë skenar, aktorë apo efekte speciale, ka arritur të gjenerojë mbi 1 milion dollarë fitime.
Bëhet fjalë për videon e famshme “Fireplace 10 hours full HD”, e cila shfaq thjesht një oxhak me dru që digjen për 10 orë rresht. Sipas një postimi viral nga “Pubity”, kjo video e ngarkuar në vitin 2016 ka arritur një shifër marramendëse prej mbi 157 milionë shikimesh.
Pse kaq shumë sukses?
Sekreti qëndron te funksionaliteti. Njerëzit në mbarë botën e përdorin këtë video si sfond për t’u relaksuar, për të studiuar, për të fjetur gjumë, apo thjesht për të krijuar atmosferë të ngrohtë në shtëpi gjatë festave, kur nuk kanë një oxhak të vërtetë.
Nga reklamat e shfaqura në këtë video, krijuesi i saj llogaritet të ketë fituar mbi 1 milion dollarë. Ky rast është bërë viral në rrjetet sociale, duke nxitur reagime të shumta nga njerëzit që me shaka thonë se “po bëjnë gjithçka gabim” me karrierën e tyre, ndërkohë që dikush po fiton miliona thjesht duke lënë një video të “digjet” në sfond.
Një shembull perfekt i shprehjes “Work smarter, not harder”. /Prive By Liberta Spahiu
