Pas zhurmës së madhe që u krijua në rrjet orët e fundit nga deklarata e artistes Alida Hisku, menaxhmenti i Taynës ka vendosur të thyejë heshtjen për të sqaruar opinionin publik me transparencë totale. Ndërsa portalet zienin për “vlerën” e pagesës, e vërteta prapa bashkëpunimit për hitin “Thana” rezulton të jetë krejtësisht ndryshe nga çfarë u aludua. Ekipi i reperes ka bërë të qartë se nuk ka pasur asnjë shfrytëzim apo neglizhencë, por një korrektësi maksimale ligjore dhe financiare, e bazuar plotësisht në kërkesat e vetë artistëve të vjetër.
Tayna, e cila gjithmonë ka treguar respekt për ikonat e muzikës shqiptare, kishte dhënë një urdhër të prerë për stafin e saj: të paguhej çfarëdo shume që do të kërkohej, pa negociata.
Fakti që pagesat janë bërë ekzaktësisht sipas kërkesës së palëve dhe janë të faturuara me kontrata të rregullta, rrëzon poshtë narrativën e “viktimizimit” që u krijua në media. Me këtë reagim, ekipi i Taynës mbyll çdo hapësirë për keqinterpretim, duke dëshmuar se profesionalizmi dhe mirënjohja janë parësore për artisten.
Më poshtë gjeni reagimin e plotë dhe të detajuar të menaxhmentit:
REAGIM ZYRTAR: Faktet janë të dokumentuara – çdo narrativë tjetër është e pavërtetë
Pas raportimeve të shumta dhe deklaratave të fundit publike nga Alida Hisku lidhur me projektin “Thana”, ekipi i Doruntina Shalës (Tayna) ndjen obligim të sqarojë opinionin publik me fakte konkrete dhe dokumentacion zyrtar.
Marrëveshja është bërë me kontratë dhe pagesë të plotë
Për përdorimin e vargut “Anës së pas anës o, lumit të fshatit tim” janë marrë të drejtat me kontratë të rregullt dhe të nënshkruar.
Pagesat janë realizuar si më poshtë: • Enver Shëngjergji (kompozitor) – 1,000€ • Alida Hisku (interpretuese) – 250€ • Zhuliana Jorganxhi (tekstshkruese) – 250€
Totali: 1,500€, sipas kërkesës së vetë palëve.
Pra, bëhet fjalë për autorizim të rregullt ligjor dhe kompensim financiar të plotë.
Sipas rregullave të industrisë, beat-i është pronë e kompozitorit/producentit
Është e rëndësishme të theksohet se sipas praktikave dhe rregullave standarde të industrisë muzikore, beat-i dhe prodhimi muzikor janë pronë e kompozitorit/producentit.
Në këtë rast: • Kompozitor/Producent i “Thana”: Mixey
Shuma prej 1,000€ i takon kompozitorit për të drejtat e autorizimit.
Sa i përket shumave prej 250€ për znj. Alida Hisku dhe 250€ për znj. Zhuliana Jorganxhi — këto janë dhënë me respekt dhe me dëshirë, sipas kërkesës së tyre personale.
Madje, Tayna ka qenë e qartë me ekipin e saj: nëse do të kërkohej më shumë, ajo ishte e gatshme ta paguante.
Për shkak të moshës, karrierës dhe kontributit të një gjenerate artistësh që kanë kaluar periudha të vështira, Tayna ka thënë shprehimisht: “Sa kërkojnë, jepjuani.”
Kjo nuk është çështje detyrimi, por respekti.
Kontradikta publike
Është fakt se në një intervistë tjetër, znj. Alida Hisku ka deklaruar se kënga është “dhuruar”. Ndërsa tani pretendohet sikur nuk ka pasur marrëveshje apo kompensim të duhur.
Këto deklarata janë në kundërshtim të drejtpërdrejtë me kontratën e nënshkruar dhe pagesat e realizuara.
Të lihet të kuptohet publikisht se është bërë padrejtësi apo shfrytëzim, kur ekziston marrëveshje ligjore dhe pagesë sipas kërkesës së tyre, përbën deformim të realitetit dhe dëmton reputacionin e artistes.
Qëndrimi ynë
Tayna ka vepruar: • Me kontratë të rregullt • Me pagesë sipas kërkesës së tyre • Me respekt maksimal profesional dhe njerëzor
Çdo pretendim për përdorim pa leje apo mosrespektim nuk qëndron.
Në rast se vazhdohet me deklarata të pavërteta që cenojnë figurën e artistes, do të shqyrtohen seriozisht hapat ligjorë për mbrojtjen e reputacionit.
Ne nuk kërkojmë konflikt. Kërkojmë vetëm që faktet të respektohen.
Dokumentacioni ekziston. Pagesat janë kryer. Marrëveshja është e nënshkruar.
/Prive By Liberta Spahiu
