Sot në Gjykatën e Posaçme Kundër Korrupsionit dhe Krimit të Organizuar (GJKKO) po zhvillohet një tjetër seancë e rëndësishme gjyqësore në ngarkim të Laert Haxhiut, i cili akuzohet për një sërë veprash të rënda kriminale.
Një detaj që ka tërhequr vëmendjen në këtë proces, sipas raportimeve nga Tv Klan, është prania në sallën e gjyqit e reperit të njohur Rigels Rajku (Noizy). Ai është thirrur për të marrë pjesë në këtë seancë në cilësinë e viktimës së veprës penale.
Prapaskena e sulmit me eksploziv
Përfshirja e Noizyt në këtë dosje hetimore lidhet drejtpërdrejt me sulmin e bujshëm me lëndë plasëse që iu bë lokalit dhe dyqanit të tij në qytetin e Durrësit në qershor të vitit 2022.
Sipas hetimeve të thelluara të SPAK, dyshohet se urdhri për vendosjen e tritolit në bizneset e reperit është dhënë pikërisht nga Laert Haxhiu. Ky akt kriminal mendohet të ketë ardhur menjëherë pas konfliktit fizik dhe mediatik që Noizy kishte pasur me reperin dhe personazhin e rrjeteve sociale, Kleviol Ahmeti, i njohur gjerësisht me pseudonimin Cllevio.
