Pak kohë pasi ndanë me të gjithë lajmin e bukur se po bëhen prindër për herë të parë, Ardian Bujupi dhe bashkëshortja e tij, Fjolla Fetinci, na paskan rezervuar një tjetër surprizë për ndjekësit e tyre. Çifti sapo ka zbuluar gjininë e bebit që po presin dhe përgjigja përfundimtare është djalë.
Fjolla ka ndarë në llogarinë e saj në Instagram një fotografi shumë të ëmbël krah Ardianit, ku këngëtari i mban duart rreth barkut të saj të rrumbullakosur që tashmë është mjaft i dukshëm. “Është djalë”, ka shkruar ajo e emocionuar krahas fotos, duke e shoqëruar me një zemër blu dhe duke konfirmuar kështu se familja e tyre shumë shpejt do të zgjerohet me një trashëgimtar. Fotografia ka marrë menjëherë qindra urime nga miqtë, kolegët dhe fansat e dyshes.
Kujtojmë se Ardiani, i cili ndër vite e ka ruajtur me shumë fanatizëm jetën e tij private dhe lidhjet romantike, u martua në fshehtësi të plotë me Fjollën dhe e prezantoi atë zyrtarisht te publiku vetëm në vjeshtën e vitit 2024. Ndërkaq, në shkurt të këtij viti, ata e konfirmuan përfundimisht pritjen e ëmbël me mbishkrimin “Mirë se vjen engjëlli ynë”, pas shumë aludimeve në rrjet. Tani që misteri i gjinisë u zgjidh dhe dyshja duket më e lumtur se kurrë në këtë kapitull të ri, nuk na mbetet gjë tjetër veçse t’u urojmë atyre një periudhë sa më të qetë deri në lindje. /Prive By Liberta Spahiu
