Nxjerrja e ekspertizës paraprake mjeko-ligjore ka hedhur dritë mbi rrethanat e humbjes tragjike të jetës së 25-vjeçares Xhuana Nikollaj. E reja ndërroi jetë në Qendrën Spitalore Universitare “Nënë Tereza”, në atë që autoritetet e po e trajtojnë si një ngjarje në rrethana tejet të rënda.
Burime nga grupi hetimor bëjnë me dije se në trupin e të resë janë konstatuar shenja dëmtimesh fizike. Për këto gjetje, organet e drejtësisë kanë ngritur dyshime mbi ish-partnerin e saj, E. F., i cili aktualisht është shpallur në kërkim nga policia për t’u pyetur rreth rrethanave të ngjarjes.
Nga hetimet e prokurorisë rezulton se 25-vjeçarja dhe ish-partneri i saj ishin ndarë prej disa kohësh. Për këtë arsye, e reja ishte larguar nga Shëngjini dhe ishte zhvendosur në një banesë me qira në Tiranë. Ditën e ngjarjes, dyshohet se ata kanë pasur një takim në këtë banesë, ku mendohet të ketë ndodhur edhe një konflikt i ashpër mes tyre, gjë që përputhet me gjetjet e aktekspertizës mjeko-ligjore, shkruan Joq Albania.
Ndërkohë, ndryshe nga sa ishte raportuar më herët në disa media, ekspertiza ka konfirmuar zyrtarisht se 25-vjeçarja nuk ishte shtatzënë. Në kallëzimin e depozituar nga familjarët e saj, pretendohet se e reja ishte përballur me sjellje agresive të vazhdueshme nga ish-partneri, duke kërkuar zbardhjen e plotë të së vërtetës.
Sipas të njëjtave burime, para ngjarjes fatale, e reja kishte lënë një mesazh drejtuar familjes. Në këtë letër, ajo shprehte dhimbjen për situatën e vështirë që po kalonte prej personave që e kishin lënduar, ndërsa në fund i kërkonte ndjesë prindërve të saj.
Policia po vijon intensivisht punën për kapjen e personit të shpallur në kërkim dhe dokumentimin e plotë ligjor të kësaj ngjarjeje që ka tronditur opinionin publik. /Prive By Liberta Spahiu
