Të premten që lamë pas, tregut tonë muzikor iu shtua një projekt që duket se po e gjen shumë shpejt rrugën për te veshët e publikut. Blero dhe Majlinda Topanica kanë bashkuar forcat për të sjellë baladën e tyre më të re të titulluar “Ki me pa”. Për këdo që i kishte munguar stili karakteristik i Bleros në balada, i gërshetuar këtë herë mjeshtërisht me vokalin e spikatur të Majlindës, ky bashkëpunim është fiks ajo që duhej për t’i dhënë një tjetër ritëm kësaj periudhe.
Natyrisht, ky projekt nuk do të kishte të njëjtin impakt pa punën e Bini Diez, i cili është kujdesur për muzikën dhe produksionin, duke i dhënë këngës kornizën e duhur.
Dhe nëse doni prova për suksesin e këtij bashkëpunimi, mjafton t’i hidhni një sy shifrave. Vetëm pak ditë pas premierës në platformën YouTube, kënga ka kapur me shpejtësi qindra mijëra klikime, një tregues i qartë se dyshja ka goditur aty ku duhet.
Artistët kanë sjellë një kimi muzikore që po pëlqehet masivisht, duke dëshmuar edhe një herë se kur talenti bëhet bashkë me një produksion, rezultati flet vetë. Projekti po rritet organikisht dhe me këtë trend, “Ki me pa” është rrugës së sigurt për t’u kthyer në një nga baladat më të dëgjuara të momentit. /Prive By Liberta Spahiu
