Influencerja e njohur, Hati, ka ndarë me ndjekësit e saj një zhvillim mjaft serioz ditën e sotme. Përmes një postimi në llogarinë e saj në Instagram, ku ka fotografuar ambientet e jashtme të Drejtorisë së Policisë së Tiranës, ajo ka bërë të ditur se i është drejtuar autoriteteve për të bërë një denoncim zyrtar.
Shkaku i këtij veprimi drastik është një rast manipulimi i imazhit të saj përmes përdorimit të teknologjisë së Inteligjencës Artificiale (AI). Hati ka sqaruar për publikun se materialet që po qarkullojnë kohët e fundit në rrjet, të cilat e përfshijnë atë, janë tërësisht të rreme dhe të montuara me qëllime të pastra keqdashëse.
Pavarësisht situatës së pakëndshme, ajo ka përcjellë një mesazh të prerë dhe të fortë për ndjekësit dhe keqbërësit. Ajo theksoi se këto sulme të ulëta nuk e prekin aspak personalisht. “Unë e di kush jam dhe nuk më cenon asgjë e tillë,” ka shkruar Hati në postimin e saj.
Në mbyllje të reagimit, ajo ka lëshuar një paralajmërim të qartë dhe të drejtpërdrejtë për personat që fshihen pas këtij akti kibernetik. Ajo bëri me dije se çdo individ që merret me veprime të tilla manipuluese dhe tenton të njollosë imazhin e saj, do të mbajë përgjegjësi të plotë dhe do të përballet me pasoja të rënda ligjore. /Prive By Liberta Spahiu
