Në një rrëfim të mbushur me detaje surreale, Monika Kryemadhi ka treguar së fundmi prapaskenat e ndarjes së saj të bujshme nga ish-bashkëshorti Ilir Meta. E ftuar në emisionin e drejtuar nga Fiori Dardha në Top News, ajo ndau me publikun dyshimet e fabrikuara për një tradhti të mundshme dhe thashethemet për një “të dashur” misterioz, të cilat qarkullonin brenda vetë radhëve të rrethit të tyre politik dhe që çuan në krisjen e marrëdhënies.
Sipas Monikës, gjithçka nisi kur personat nga rrethi i ngushtë i Metës filluan të përhapnin fjalë se kishin gjetur mesazhe komprometuese në telefonin e saj. “Të paktën kështu më thanë mua, rrethi që rrinte me Ilir Metën, që në telefonin e Monikës kemi gjetur një të dashur,” zbuloi ajo gjatë intervistës.
Kryemadhi shtoi me ironi se për të pasur një lidhje paralele, fillimisht duhet të kesh kohë të lirë, diçka që asaj i mungonte pasi ishte vazhdimisht e angazhuar me vetë bashkëshortin dhe aktivitetin e tyre. Megjithatë, këto dyshime morën përmasa aq të mëdha, saqë Meta vendosi të largohej nga shtëpia, duke sjellë një ndarje fizike shumë përpara se të flitej për një divorc zyrtar.
E gjithë kjo dramë ishte ndërtuar mbi disa biseda që Kryemadhi kishte pasur me një numër të regjistruar në celularin e saj me nofkën “zemra ime”.
Këto mesazhe u printuan dhe u manipuluan nga njerëzit rreth Metës për t’ia treguar atij si fakte të një tradhtie, ndërkohë që ai vetë nuk i mbante mend bisedat. Pika kulminante e kësaj situate u shpalos gjatë një seance gjyqësore me përfaqësuesit e SPAK. “Kur e lexoi prokurori, doli që numri i regjistruar ‘zemra ime’ është pikërisht numri i Ilir Metës,” u shpreh ajo, duke konfirmuar se “dashnori” misterioz ishte në fakt vetë ai. Kur u pyet për reagimin e Metës në sallën e gjyqit pas këtij zbulimi, Monika theksoi prerë se as nuk e kishte kthyer kokën për ta parë, duke shtuar se nuk ndjen më asnjë interes për reagimet e tij. /Prive By Liberta Spahiu
