Me përfundimin e rrugëtimit të tij në “Big Brother VIP” dhe rikthimin në dinamikën e përditshme, Miri së bashku me Landin kanë përgatitur një rikthim në skenë për West Side Family që do të mbetet gjatë në kujtesë. Sonte, ajo që mund të ngjajë thjesht si një mbrëmje fundjave në një nga klubet e kryeqytetit, do të transformohet në një moment me peshë të jashtëzakonshme emocionale.
Për herë të parë në një format të tillë, dyshes do t’u bashkohet në skenë miku dhe bashkëpunëtori i tyre i ndjerë, Dr. Flori.
Përmes teknologjisë inovative të hologramit 3D, silueta dhe zëri i papërsëritshëm i kantautorit do të projektohen pranë tyre, duke krijuar iluzionin e bukur të një performance të përbashkët të treshes. Ky moment i veçantë do të risjellë për publikun disa nga hitet e pavdekshme që shënjuan muzikën shqiptare vite më parë.
Përfshirja e një dimensioni kaq të ndjeshëm në mjediset e jetës së natës kërkon një kujdes specifik, por djemtë e kanë realizuar këtë me profesionalizmin maksimal për të ruajtur të pacenuar dinjitetin e figurës së mikut të tyre, pa e kthyer në një spektakël të ekzagjeruar. Për të gjithë të pranishmit sonte, ky rikthim premton një udhëtim të paharrueshëm nostalgjie dhe një homazh të vërtetë për kohët e arta të grupit. /Prive By Liberta Spahiu
