Një përditësim i fundit që ka përfshirë Instagramin nuk ka lënë asnjë të paprekshëm, dhe shifrat që po qarkullojnë në rrjet kanë tërhequr vëmendjen e menaxherëve në mbarë botën.
Meta ka vendosur të bëjë një pastrim të llogarive inaktive dhe bot-eve, duke shkaktuar një rënie të ndjeshme të numrave për figurat më të mëdha të showbiz-it. Cristiano Ronaldo, për shembull, u shfaq me 6.6 milionë ndjekës më pak, një shifër kjo mjaft e lartë. As emra si Kylie Jenner dhe Kim Kardashian nuk i shpëtuan këtij procesi, pasi secilës iu fshinë mbi 5 milionë llogari brenda një kohe të shkurtër, duke treguar se një pjesë e atyre shifrave i përkiste profileve inaktive.
Kjo valë pastrimi ka prekur edhe yjet e kinematografisë turke, veçanërisht kastën e serialit “Eşref Rüya”.
Aktori Çağatay Ulusoy ka pasur një rënie prej rreth 100 mijë ndjekësish, një humbje që, megjithëse duket e vogël përballë yjeve globalë, tregon se algoritmi po vepron kudo.
Situata duket pak më e ndjeshme për Demet Özdemir; aktorja ka humbur plot 400 mijë ndjekës, duke u bërë një nga figurat turke më të prekura nga ky përditësim.
Përballja me këtë realitet dixhital tregon se fokusi po kalon te numrat e audiencës organike dhe ndjekësit realë. Për menaxherët e personazheve publikë, kjo është një periudhë riorganizimi, ndërsa platformat po përpiqen të pasqyrojnë një angazhim më të vërtetë të publikut. /Prive By Liberta Spahiu
