Maison de Parfum Prishtina solli në kryeqytet universin elegant të Casamorati-t, në një event ku historia italiane e parfumerisë u takua me stilin bashkëkohor dhe preferencat personale të të ftuarve.
Në botën e parfumerisë niche, disa brende njihen për aromat, ndërsa disa të tjera ndërtojnë rreth tyre një univers të tërë. Casamorati i përket kategorisë së dytë.
Nga shishet teatrale dhe ngjyrat e pasura, deri te emrat që tingëllojnë si kapituj të një romance italiane, çdo element i brendit është menduar për ta bërë parfumin më shumë sesa një pjesë të rutinës së bukurisë. Është një objekt dëshire, një kujtim dhe, shpesh, një deklaratë personale.
Kjo filozofi u soll në Prishtinë përmes një mbrëmjeje të organizuar nga Maison de Parfum Prishtina, ku Casamorati ishte protagonisti i një eventi të mbushur me aromë, estetikë dhe elegancë të përmbajtur.
Hapësira e hapur, e rrethuar nga gjelbërimi dhe arkitektura karakteristike, u shndërrua në një skenë natyrale për koleksionet e brendit. Dekori floral, ndriçimi i butë dhe ekspozimi i parfumeve krijuan një atmosferë intime, ku të ftuarit mund t’i zbulonin aromat pa ngut, duke i provuar dhe duke u njohur me historitë pas tyre.
Në qendër të mbrëmjes ishte prezantimi i Tempio d’Acqua, krijimi më i ri i Casamorati-t. Aroma ndërton një kontrast elegant mes freskisë dhe ngrohtësisë: agrumet dhe pjeshka i japin hapjes dritë, ndërsa vanilja, mirra dhe notat më të thella i sjellin karakter dhe qëndrueshmëri.
Nuk është një parfum që kërkon vëmendjen me zhurmë. Është më tepër një kompozim që zbulohet gradualisht, duke ndryshuar në lëkurë dhe duke lënë pas një gjurmë të butë, por të dallueshme.
Historia e Casamorati-t nis në Itali në fund të shekullit XIX. Pas ringjalljes së tij nën vizionin e Xerjoff-it, brendi ruajti frymën nostalgjike dhe romantike, por e përshtati atë me kërkesat e parfumerisë moderne.
Kjo lidhje mes së shkuarës dhe së tashmes është edhe ajo që e bën Casamorati-n të dallueshëm. Koleksionet e tij nuk mbështeten vetëm në nota aromatike, por në karaktere dhe emocione. Disa krijime janë të ëmbla dhe lozonjare, të tjera më pudrore, florale apo intensive, por secila ka një identitet të qartë.
Në event ishte i pranishëm edhe përfaqësuesi i brendit, i cili ndau më shumë detaje rreth filozofisë së Casamorati-t, procesit të krijimit dhe mënyrës se si një parfum ndërtohet përtej formulës së tij.
Pikërisht këtu qëndron edhe fuqia e parfumeve: në aftësinë për ta kthyer një ndjesi në kujtim. Një aromë mund të na rikthejë te një vend, një person apo një periudhë, edhe shumë kohë pasi momenti ka kaluar.
Me eventin kushtuar Casamorati-t, Maison de Parfum Prishtina solli në fokus jo vetëm një lansim të ri, por edhe një mënyrë më personale për ta përjetuar parfumerinë.
Krijimet e Casamorati-t mund të gjenden në pikat e Maison de Parfum Prishtina në Prishtina Mall dhe Albi Mall, si dhe online.
Sepse parfumi, në fund, nuk zgjidhet vetëm për mënyrën se si aromatizon lëkurën. Zgjidhet për mënyrën se si na bën të ndihemi. /Prive By Liberta Spahiu
