Shtëpia e Big Brother VIP Kosova vazhdon të jetë epiqendra e surprizave dhe duket se akulli mes dy banorëve më të komentuar, Dolces dhe Limit, ka filluar të shkrihet. Pas ditëve të tensionuara dhe distancës që kishte pllakosur raportin e tyre, dita e sotme solli pamje që publiku i ka pritur me padurim. Dyshja janë parë sërish shumë pranë njëri-tjetrit, duke ndarë një përqafim të ngrohtë që nuk dukej aspak si një përshëndetje shoqërore, por si një shprehje e pastër malli. Ky afrimitet i papritur ka ngritur menjëherë pikëpyetjet nëse mes tyre po rilind ajo shkëndija e vjetër që mbajti mbërthyer shikuesit për javë të tëra.
Por, kiminë mes tyre nuk po e vëren vetëm publiku nga ekranet. Edhe brenda shtëpisë, banorët e tjerë kanë filluar të ndiejnë ndryshimin e atmosferës.
Labi, gjithmonë i vëmendshëm ndaj detajeve, nuk i ka kursyer komplimentet për Dolcen gjatë një bisede të shtruar pikërisht me Limin.
Pa dorashka, Labi e cilësoi atë si një “femër me shumë klas”, duke i dhënë një notë të lartë sjelljes së saj në shtëpi. Dhe duket se Limi mezi priti ta aprovonte këtë konstatim. Ai jo vetëm që nuk e kundërshtoi, por e përforcoi mendimin e Labit duke u shprehur me vlerësim maksimal se Dolce është dikush që “i di limitet”. Kjo deklaratë e Limit vjen si një vulë aprovimi për karakterin e saj, duke lënë të kuptohet se respekti mes tyre mbetet i palëkundur, pavarësisht baticave dhe zbaticave të lojës.
Mbetet për t’u parë nëse ky përqafim dhe këto fjalë të mira janë vetëm një armëpushim i përkohshëm apo fillimi i një kapitulli të ri romantik. /Prive By Liberta Spahiu
