Një mbrëmje që kishte emocionin e parë të një dashurie dhe madhështinë e një ylli ndërkombëtar! Alban Skënderaj ka shkruar histori mbrëmë në një nga skenat më prestigjioze të Italisë, Unipol Forum në Milano, aty ku kanë performuar gjigantë të muzikës botërore si Madonna, Ed Sheeran, Coldplay, Dua Lipa dhe Laura Pausini.
Por mbrëmja e djeshme i përkiste vetëm një emri: Alban Skënderaj.
Me një publik që numëronte plot 16,000 fansa, salla ishte e mbushur deri në detajin e fundit, me zemra që këndonin në një zë, lot që rridhnin nga emocionet dhe telefonë që ndriçonin si yje në qiell. Atmosfera ishte elektrizuese – një bashkim i papërshkrueshëm mes artistit dhe publikut, ku çdo këngë ishte një kujtim, çdo fjalë një rrëfim.
Skënderaj solli në skenë një repertor të pasur, duke prekur jo vetëm hitet që e bënë të dashur për shqiptarët, por edhe këngë të reja që u përjetuan si himne nga publiku.
Me një performancë që i kaloi pritshmëritë, ai tregoi edhe një herë pse është një nga artistët më të dashur të trevave shqiptare dhe tashmë edhe më gjerë. Në backstage nuk munguan emocionet, ndërsa rrjetet sociale “shpërthyen” me video e komente që e quajnë këtë koncert si “momenti kulmor të karrierës së Albanit”.
Mbrëmja e 14 majit në Milano nuk ishte thjesht një koncert! Ishte një triumf, një manifestim dashurie dhe një moment krenarie shqiptare në zemër të Italisë. /Prive By Liberta Spahiu
