Banda më e frikshme e Shqipërisë ka pësuar një kolaps të bujshëm pas arrestimit të drejtuesve të saj, duke shënuar fundin e një karteli që ka trafikuar kokainë me vlerë miliarda paundësh nga Amerika Latine drejt Europës.
E udhëhequr nga bosët e drogës Franc Çopja, 33 vjeç, dhe Ervis Cela, 41 vjeç, klani Cela-Çopja ishte një nga organizatat më të fuqishme shqiptare në tregtinë ndërkombëtare të kokainës, me kapacitet të ndikonte drejtpërdrejt në çmimin e drogës në Bashkimin Europian.
Fitimet gjigante të kartelit pastroheshin përmes investimeve në prona luksoze në Shqipëri dhe jashtë saj, përfshirë një resort turistik pesë yje, vila dhe apartamente. Por operacioni i bandës u shemb plotësisht kur Çopja dhe Cela u arrestuan bashkë me vartësit e tyre dhe pasuritë iu sekuestruan nga SPAK – Struktura e Posaçme kundër Korrupsionit dhe Krimit të Organizuar.
Në mars 2021, një operacion i gjerë ndërkombëtar nga policia franceze, belge dhe holandeze arriti të përshkonte serverët e Sky ECC, rrjeti më i madh në botë i telefonave të enkriptuar. Hetuesit zbuluan rreth 1.7 miliardë mesazhe të shkëmbyera mes qershorit 2019 dhe marsit 2021, çka çoi në arrestimin e qindra trafikantëve të drogës në gjithë Europën.
Arrestimet
Cela, i kërkuar në Itali për torturimin dhe vrasjen e një shqiptari tjetër rival, u kap më 29 qershor 2024 në fshatin Qeparo, pas 11 vitesh arrati. Ai u arrestua bashkë me dy vëllezërit e tij dhe tetë bashkëpunëtorë në disa operacione të befasishme gjatë verës.
Çopja, i konsideruar “truri logjistik” i organizatës, u arrestua në dhjetor 2023 në Belgjikë dhe aktualisht gjykohet për vrasje pas ekstradimit nga vila e tij miliona dollarëshe në Dubai.
Hetuesit deklaruan se organizata kishte nën kontroll gjithë zinxhirin e trafikut të kokainës – nga prodhimi në Paraguai, te shpërndarja në Europë, e deri te pastrimi i parave përmes investimeve në pasuri të paluajtshme.
Ngarkesat e drogës
Sipas aktakuzës 282-faqëshe të SPAK, karteli tentoi të trafikonte 28 ton kokainë nga Paraguai drejt porteve të Antwerp dhe Hamburg mes viteve 2020–2021.
-
Në nëntor 2020, rreth 11.6 ton kokainë me vlerë 1.3 miliard £ mbërritën në Antwerp.
-
Në shkurt 2021, 16.4 ton kokainë (me vlerë 3 miliard £) të fshehura në 1,700 kuti me material ndërtimi u sekuestruan në Hamburg.
Një pjesë e drogës besohet të ketë kaluar në Mbretërinë e Bashkuar, ku konsumi vjetor arrin rreth 117 tonë, sipas Agjencisë Kombëtare të Krimit (NCA).
Pastrim parash dhe pasuri të sekuestruara
Karteli përdorte një sistem informal të transferimit të parave të njohur si “hawala”, ku përfshiheshin shoferë ndërkombëtarë autobusësh për të dërguar fitimet e paligjshme nga Europa në Shqipëri.
SPAK ka sekuestruar të paktën 14 pasuri me vlerë disa milionë euro, përfshirë resortin luksoz “Ajman Park” në Shijak.
Në një komunikim të dhjetorit 2020, Cela dhe Çopja diskutonin për mënyrën e fshehjes së milionave euro. Cela sugjeronte varrosjen e parave nën rrënjët e ullinjve, ndërsa Çopja i rekomandonte t’i kthente në ar për të mos u prishur.
E kaluara kriminale
Cela kishte një histori të gjatë me drejtësinë italiane. Në vitin 2008, ai, vëllai i tij Ardiani dhe një bashkëpunëtor tjetër u dënuan për vrasjen makabre të shqiptarit Petrit Keçi, të cilin e ekzekutuan me gjashtë plumba në kokë dhe më pas dogjën trupin për të fshehur provat. Pas një procesi të gjatë, Cela u dënua me 30 vite burg, por arriti të arratisej pas skadimit të afatit të paraburgimit në vitin 2014.
Tashmë, përveç akuzave për trafik ndërkombëtar droge, Cela duhet të vuajë edhe një dënim 21-vjeçar për vrasje, rrëmbim, fshehje trupi, armëmbajtje pa leje, kërcënime dhe pengim të drejtësisë. /Prive By Liberta Spahiu
