Pijet energjike janë bërë pjesë e përditshmërisë së shumë njerëzve, veçanërisht tek të rinjtë që kërkojnë një “shpëtim” të shpejtë nga lodhja dhe mungesa e energjisë. Por ekspertët paralajmërojnë se përdorimi i tyre i shpeshtë shoqërohet me rreziqe serioze për shëndetin. Një studim i fundit ka treguar se vetëm një muaj pa konsumuar pije energjike mjafton që trupi të nisë të përjetojë ndryshime pozitive të dukshme.
Pas ditëve të para – Trupi fillon të çlirohet nga nivelet e larta të sheqerit dhe kafeinës që zakonisht gjenden në këto pije. Shumë persona ndjejnë lodhje në fillim, por gradualisht organizmi stabilizohet dhe energjia natyrale fillon të rikthehet.
Pas 1 jave – Shëndeti i zemrës përmirësohet ndjeshëm. Rrahjet e zemrës bëhen më të rregullta, presioni i gjakut bie dhe trupi nuk është më i ekspozuar ndaj “goditjeve” të papritura të kafeinës.
Pas 2 javësh – Shumë njerëz raportojnë gjumë më të qetë dhe cilësor. Pijet energjike shpesh shkaktojnë pagjumësi, prandaj mungesa e tyre ndikon drejtpërdrejt tek cilësia e pushimit.
Pas 3 javësh – Lëkura fillon të duket më e pastër, pasi sheqeri dhe aditivët që gjenden tek pijet energjike janë të lidhura me inflamacionin dhe aknet. Gjithashtu, stomaku punon më lehtë, pasi organizmi nuk është më i mbingarkuar nga aciditeti i tyre.
Pas 1 muaji – Trupi është më i balancuar, niveli i energjisë është më stabil gjatë gjithë ditës, humori përmirësohet dhe shumë persona humbin peshë, pasi kanë hequr qindra kalori të panevojshme që gjenden tek pijet energjike.
Ekspertët e shëndetit theksojnë se zëvendësimi i pijeve energjike me ujë, çaj jeshil ose fruta të freskëta është mënyra më e shëndetshme për të pasur energji dhe fokus gjatë ditës. /Prive By Liberta Spahiu
