Reperi dhe artisti shqiptar Gashi ka zbuluar se është autor i të gjithë soundtrack-ut për sfilatën e fundit të brandit prestigjioz Kith, që rikthehet pas gjashtë vitesh në pasarelë.
Në një postim emocionues në Instagram, ai tregoi se lidhja e tij me themeluesin e Kith, Ronnie Fieg, nis që nga viti 2012, kur u njohën dhe miqësia e tyre u shndërrua në një raport mentor–nxënës. Sot, kjo marrëdhënie solli një bashkëpunim historik, pasi Fieg e ftoi Gashin të krijojë muzikën për koleksionin e ri të shtëpisë së modës.
“Kur më tha se sa shumë do të thoshte për të muzika ime dhe më ftoi në Itali, nuk e kisha menduar kurrë se do të më besonte krijimin e gjithë kolonës zanore për sfilatën e tij. Është diçka që nuk do ta marr kurrë lehtë,” shkroi Gashi.
Ronnie Fieg, një nga emrat më me ndikim në modën bashkëkohore, është themeluesi i Kith dhe konsiderohet “mbreti i bashkëpunimeve”.
Ai ka punuar me dhjetëra brende të njohura botërore si Adidas, Nike, New Balance, ASICS, Puma, BAPE, si dhe me gjigantë të modës si Versace, Tommy Hilfiger, Polo Ralph Lauren, ndërkohë që ka realizuar koleksione speciale edhe me marka ikonike të pop-kulturës si Coca-Cola, Rugrats dhe Cap’n Crunch. Përtej modës, Fieg ka sjellë bashkëpunime edhe me sektorin e automobilave, siç është partneriteti me BMW, duke krijuar versione të personalizuara të modeleve luksoze.
Ftesat për eventin tashmë janë shpërndarë dhe shfaqja do të mbahet më 17 gusht 2025, në 337 Lafayette Street, New York, ku publiku do të përjetojë koleksionin “The Institution of Kith” të shoqëruar nga muzika e artistit shqiptar.
Ky bashkëpunim shënon jo vetëm një arritje personale për Gashin, por edhe një dëshmi të fuqishme se muzika dhe moda mund të gërshetohen në mënyrë unike për të krijuar përvoja të paharrueshme. /Prive By Liberta Spahiu
