Vesa Vllasaliu ka vendosur të mos heshtë përballë komenteve negative lidhur me pamjen e saj fizike, vetëm dy muaj pasi u bë nënë për herë të parë.
Përmes disa postimeve të ndara me ndjekësit në llogarinë e saj në Instagram, ajo ka dhënë një mesazh të fortë dhe të drejtpërdrejtë për të gjithë ata që gjykojnë trupin e një gruaje pas shtatzënisë.
Në njërin prej postimeve në Instastory, Vesa theksoi se shtimi në peshë pas një lindjeje është një proces krejtësisht normal dhe nuk duhet të etiketohet me terma ofendues. “Le ta sqarojmë një gjë,” shkroi ajo. “Një grua që ka lindur para 2 muajve nuk është ‘e trashë’. Ajo është MAMI.”
Ky reagim vjen si një mburojë jo vetëm për veten e saj, por për të gjitha nënat e reja që përballen me presione të panevojshme estetike gjatë periudhës delikate të paslindjes.
Megjithatë, ajo që duket se e ka zhgënjyer më shumë Vesën nuk janë thjesht komentet negative, por fakti se nga kush vijnë ato.
Në një postim pasues, ajo ngriti shqetësimin për mungesën e solidaritetit mes vetë vajzave dhe grave. “Ma keqja? Janë gratë që e bëjnë me njëra-tjetrën,” u shpreh ajo, duke theksuar fenomenin e hidhur ku gratë bullizojnë dhe gjykojnë ashpër njëra-tjetrën për peshën. /Prive By Liberta Spahiu
