Një 21-vjeçar, i identifikuar si Beran Aliyi, është deklaruar fajtor për planifikimin e një sulmi terrorist në koncertin e yllit botëror Taylor Swift në Vjenë. Aliyi, një shtetas austro-maqedonas me rrënjë shqiptare, u përball me akuzat e rënda gjatë nisjes së gjyqit, ku u zbuluan detaje tmerruese mbi mënyrën se si kishte menduar të shkaktonte një masakër masive.
Sipas prokurorisë, Aliyi kishte hartuar një plan të imtësishëm për të goditur turmat e fansave (të njohur si “Swifties”) jashtë stadiumit “Ernst Happel” në gusht të vitit 2024. Ai synonte të përdorte makinën e tij tip “VW Beetle”, të pajisur me sirena të rreme policie dhe drita blu, për t’u afruar sa më shumë viktimave pa rënë në sy, duke simuluar një mjet zyrtar.
Mënyra e planifikuar e sulmit ishte veçanërisht mizore: i akuzuari kishte përgatitur eksplozivë të fshehur brenda një kanoçeje “Red Bull”, të cilën synonte ta shpërthente në mes të turmës për të krijuar kaos dhe vdekje. Pas shpërthimit, plani i tij vijonte me një sulm me hanxharë dhe thika, me qëllimin e vetëm për të vrarë sa më shumë njerëz të ishte e mundur përpara se të neutralizohej.
Hetuesit zbuluan se Aliyi kishte grumbulluar materiale për prodhimin e bombave të llojit TATP, e njëjta lëndë shpërthyese vdekjeprurëse e përdorur në sulmet e Londrës në vitin 2005 dhe në Mançester në vitin 2017. Gjatë bastisjes në banesën e tij në Ternitz, vetëm një ditë para koncertit, policia gjeti lëngun e rrezikshëm të fshehur në frigoriferin e familjes, si dhe 21,000 euro para të falsifikuara.
Në gjykatë u bë e ditur se Aliyi i kishte betuar besnikëri udhëheqësit të Shtetit Islamik (ISIS) fiks një muaj para arrestimit. Megjithatë, u zbulua se ai ishte tërhequr nga një plan tjetër terrorist i lidhur me ISIS-in që synonte Arabinë Saudite, Turqinë dhe Emiratet e Bashkuara Arabe në fillim të atij viti, duke u përqendruar më pas te objektivi në Vjenë.
Përveç Aliyit, në këtë rrjet ishte i përfshirë edhe një 16-vjeçar në Gjermani, i cili ndihmonte në përkthimin e udhëzuesve për prodhimin e bombave nga gjuha arabe. Ndërkohë, një person i tretë i lidhur me grupin, tashmë ndodhet në paraburgim në Arabinë Saudite pasi goditi me thikë një roje në Xhaminë e Madhe në Mekë gjatë muajit të Ramazanit.
Anulimi i të tre koncerteve në Vjenë, ku priteshin mbi 195,000 fansa, la të tronditur këngëtaren Taylor Swift dhe ekipin e saj. Në një reagim të mëvonshëm, Swift u shpreh: “Arsyeja e anulimeve më mbushi me një ndjenjë të re frike dhe një sasi të tmerrshme faji, sepse aq shumë njerëz kishin planifikuar të vinin.”
Beran Aliyi tani përballet me një dënim deri në 20 vjet burg për anëtarësim në organizatë terroriste, përgatitje të mjeteve shpërthyese dhe tentativë për blerje të paligjshme të armëve të zjarrit. Ky proces gjyqësor po ndiqet me interes të madh në Austri dhe më gjerë, si një kujtesë e rrezikut të vazhdueshëm nga radikalizimi ekstremist. /Prive By Liberta Spahiu
