Blerta Destani dhe bashkëshorti i saj Blero janë kthyer së fundmi në një simbol të forcës dhe dashurisë së pakushtëzuar në rrjetet sociale. Të njohur për ndarjen e hapur të kalvarit të tyre në Spanjë, ku Blerta po trajtohet për Instabilitetin Kranio-Cervikal (CCI) – një gjendje e rëndë që prek shtyllën kurrizore dhe kokën – ata kanë fituar zemrat e mijëra ndjekësve.
Por, transparenca e tyre ka tërhequr edhe një anë të errët. Së fundmi, Blerta ka thyer heshtjen për të denoncuar një fushatë të paprecedentë bullizimi, duke publikuar mesazhe që synojnë të shkatërrojnë psikologjikisht çiftin në momentet e tyre më të vështira.
Ndryshe nga kritikat e zakonshme online, sulmet ndaj Blertës ishin specifike dhe godisnin në moralin e marrëdhënies bashkëshortore. Përmes disa profileve të ndryshme (që Blerta i ka identifikuar si një person i vetëm), komentuesja ka ndërtuar një narrativë mizore:
Akuza për egoizëm vdekjeprurës: Në një nga komentet më të rënda, ndjekësja shkruan: “Njerin që e du, nuk e marr me vete për së gjalli në varr.” Ky koment çnjerëzor nënkupton se sëmundja e Blertës është një “varr” për Bleron dhe se ajo, nga dashuria, duhet ta braktisë atë.
Presioni për “të krijuar familje”: Duke shfrytëzuar faktin se sëmundja ka pezulluar planet e tjera të jetës, komentet godasin: “Tash është rendi jot me e lan djalin sa asht i ri me kriju familje… Ky mjaft ka ba për ty.”
Manipulimi me kujtime: Edhe postimet nostalgjike të Blertës nga koha kur ishte e shëndetshme janë etiketuar si kurthe: “Pse i poston nonstop kujtimet e bukura? Kjo po i bie si me manipulu burrin tënd, me u mbajt peng i nja 2 kujtimeve para shumë viteve.”
Pas ditësh heshtjeje, Blerta ka vendosur të reagojë “për herë të parë dhe të fundit” përmes disa postimeve në Instagram, duke dhënë një leksion jete.
Ajo e ka bërë të qartë se Blero nuk është një “peng”, por një bashkëshort i dashuruar.
“Ju çmend fakti që unë jam sëmurë dhe prapëseprapë jam thellësisht e dashur, e mbrojtur dhe e respektuar,” – shkruan ajo në reagimin e saj në anglisht. “Unë nuk ndaj as 5% të asaj që ai bën për mua… Sa herë që ai sheh komente të tilla, vetëm buzëqesh me këto përpjekje të dëshpëruara.”
Mbyllja e reagimit të saj ishte edhe pjesa më drithëruese. Duke iu drejtuar personit që fshihet pas profileve false, Blerta bëri një krahasim që ka prekur mijëra ndjekës:
“Mbajeni mend: Unë mund të jem e bllokuar në një trup që nuk funksionon siç duhet. Por ti je e bllokuar në një mendje plot xhelozi. Dhe mendoj se kjo është sëmundja më e madhe.”
Në fund, Blerta ka falënderuar komunitetin e gjerë shqiptar dhe të huaj për mbështetjen masive, duke theksuar se “99% e komenteve janë plot dashuri” dhe se nuk do të harxhojë më energji me negativitetin, ndërsa vazhdon betejën e saj për shërim. /Prive By Liberta Spahiu
